محمد فتحي يكتب: السيسي اشتغل كويس

بقلم - محمد فتحي:

وقبل ما تشتم أو تنتقد في السيسي أو اللي كاتب الكلام..

أنا واخد لنفسي حتة أمل وقاعد فيها بعد اللي سمعته النهاردة، لو مش عايز تقعد معايا فيها براحتك، بس ما تهدهاش عليا أو تتريق .. يعني ارحمني مبدئياً من فكرة شتيمته وشتيمتي..
ليه السيسي اشتغل كويس ..

لأنه عارف انه متعلق من عرقوبه ..

لو ما نجحش .. البلد فعلاً هتقع ..

ولذلك هو بيعتبر نجاحه قرار مصيري ، بغض النظر عن التمن اللي هيتدفع، لأنه أفضل بكتير من أي تمن هيتدفع في حالة فشله ..

بالراحة وبهدوء ..

ده راجل بقاله شهرين تقريباً في الحكم .. لما تيجي تقارنه باللي قبله ف أول شهرين لازم تقر ان السيسي اشتغل كويس

السيسي فكر في مشروعات بآليات تنفيذ بتكاليف بتمن بدراسة ، وبدأ ينفذ فيها خلال أول شهرين ..

بينما لما بافتكر مرسي ، كان الهدف الأول ليه في ال100 يوم الأولانيين فكرة : التمكين ، اللي تخليه بعد كدة - زي ما كانوا بيقولوا - ينفذ اللي هو عايزه للمصريين .

فلما السيسي يتكلم عن مشروع زي قناة السويس بالتفاصيل دي ، ويخش ف آليات التنفيذ دي كمشروع عملاق، ما ينفعش تقارنه بواحد كان شغال في أول شهرين على انه يقابل ناس يابانيين عشان مشروع المرور ، وبيدعو الناس تنزل تنضف عشان القضاء على مشكلة القمامة.

هتقول لي ما هو ده مشروع مرسي ؟؟

هقول لك آسف ..

ده مشروع عصام شرف بقى في الأساس

والفرق بين مشروع مرسي ومشروع السيسي هو الفرق في إرادة التنفيذ والكلام في الوسع ..

مرسي قعد أول أسبوع تقريباً في قصة حلفان اليمين بالصلاة ع النبي وكان عايز يرضي الكل ..فحلف اليمين مرة في الدستورية، ومرة في الميدان، ومرة ف جامعة القاهرة !!

إيه أول مشروع قومي مرسي اتكلم فيه خلال أول 100 يوم ؟؟ مفيش ..

طب مشروع النهضة إيه ظروفه ، والتزامات ال100 يوم ؟؟ برضه مفيش ..

أكيد كان فيه ناس ضد مرسي من اليوم الأول ..

بس كمان فيه ناس ضد السيسي من اليوم الأول ..

هتقول لي مؤسسات الدولة كانت متآمرة ضد مرسي وخاضعة للسيسي ، هقول لك ماهي دي الحدوتة .. لو رئيس مش عارف يخضع مؤسسات الدولة يبقى كل سنة وانت طيب ..

ولغاية دلوقت فاكر الكلام اللي كان بيتقال في الحرية والعدالة عن الفلوس اللي جابها مرسي من جولاته الخارجية واللي اتضح انها ولا حاجة ، وكله كذب ف كذب (فلوس ألمانيا مثلاً) ..

طيب ليه برضه السيسي ماشي كويس ؟؟

بغض النظر عن أي ملاحظات ..

السيسي مش ملاك .. بيغلط .. بس بيشتغل .

فيه مشروعات بتتعمل ، وحيز تنفيذها قليل ، يعني التزام حقيقي هيلبس في حيطة لو لم يحققه، ومع ذلك هو ملتزم بيه ، وفيه أرقام بتتقال ، يعني فرصة جديدة للمحاسبة
وده ف أول شهرين بس ..

فيه اتفاق غير معلن بينه وبين المستثمرين المصريين والشركات المصرية ..

اتبرعوا لمصر ، وهشغلكم ..

اعملوا دوركم الوطني ومسئوليتكم الاجتماعية ، وهجيبلكم شغل ..

وده يفكرني بحكاية اتحكتلي من واحد من المقربين منه أيام مشروع المليون وحدة سكنية بتاع الشركة الإماراتية ..

السيسي اشترط ان المقاولين واللي هيشتغل في المشروع يكونوا من جوة مصر ..

فالراجل قال له بس دي هتبقى خسارة لينا ..

ولما السيسي سأل .. الراجل قال له ما معناه : المقاولين المصريين بينحتونا، وبيجيبولنا خامات أغلى من اللي بنجيبها من برة ..

فالسيسي قال له : لأ .. هيشيله المرة دي المسئولية .. لأنهم لو ما أدركوش ان هامش الربح القليل اللي هياخدوه هيبقى أفضل بكتير من الخسارة اللي هيخسروها على مدى بعيد لو تم تهميشهم في المشاريع العملاقة ، يبقوا ما بيفهموش ..

وخلي الجيش يحاسبهم بالورقة والقلم

فالراجل اتطمن وقال له : طالما الجيش في الموضوع .. خلاص

وده يجرنا لنفطة تانية مهمة ..

ممكن ما تكونش راضي ان الجيش يبقى المسئول عن تنفيذ مشروع قناة السويس ..

بس الحقيقة : ده لمصلحة المشروع ..

شغل تمام يا فندم ، والالتزام ، والصرامة، وقطع الرقاب اللي بيحصل جوة الجيش هو اللي ينفع في مشروع زي كدة ..

شغل : مش هتناموا الا لما تخلصوا، وزودوا الشيفتات، وكتروا الشركات، وماليش دعوة ، وهتتحاسبوا حساب عسير هو اللي ينفع يتعمل في مشروع زي ده، ومش هينفع يتعمل الا بالجيش ومع الجيش مش مع شركات عندها بقى شروط جزائية

لكن المهم في الموضوع ان المدة اللي بتقل يواكبها جودة أعلى إن لم تكن نفس الجودة المستهدفة عشان ما نروحش كلنا ف داهية ..

وظني ان ده هيتراعى ..

كان ممكن بالمناسبة يتقال ان المشروع هيحصل على خمس سنين ، وده كان المقدر له فعلاً، ويتم العمل في المشروع خلال أول 4 سنين (فترة حكم السيسي دستورياً) ويستخدم السيسي المشروع ده بنتايجه المهولة اللي بيتكلموا عنها وقتها كورقة انتخابية ..

بس الحقيقة انه فعلاً عايز ينجز ، وعنده مشروعات جاي بيها هينفذها يعني هينفذها ..

شغلنا بقى كمراقبين وكصحفيين وإعلاميين بعيداً عن كوننا مواطنين ندعم ونحب بلدنا ، وبعيداً عمن يرون كل ذلك شو ، وبعيداً عمن لايزالوا يتعاملوا مع الأمر على ان الانقلاب يترنح، وبعيداً عن الشائعات اللي هتطلع وتكسير المقاديف اللي هيحصر ..

شغلنا الحقيقي : الدعم .. والتقويم ..

دعم حقيقي لأي مشروع محترم ، ودعم للسيسي كرئيس لمصر

وتقويم في حالة وجود خطأ نشير إليه ونصرخ به حتى لا يستفحل

تقويم مبني على ان الجميع يبحث عن مصلحة بلده وانتشالها من أزمتها

تقويم قائم على الضغط لكي لا يكون المشروع مجرد كلام ، ولإبعاد الفاسدين عنه، ولضمان خروجه بالصورة التي تحفظه من الفساد أو الهوى

وشغلنا كمان اننا لا نترك الملفات الأخرى .. بل نشير لكل ما نستطيع الإشارة إليه .. ننور في مكان عشان يتصلح ..

الموضوع مش حريات بس ، ولا معتقلين بس ، ولا ناس ماتت ظلم لازم ييجي حقها ..

الموضوع كمان تنمية

ودعم للمشروعات

وكل ده ممكن يمشي مع بعضه بالمناسبة

والأولوية فيه لتطبيق العدل والعدالة الاجتماعية

الأولوية فيه اسمها مصر ..

لمتابعة أهم وأحدث الأخبار اشترك الآن في خدمة مصراوي للرسائل القصيرة.. للاشتراك ...اضغط هنا