عمرو أبوزيد: ''بث تجريبي'' لعشاق التجارب اللي مبتكملش ونفسي أشتغل مع محمد خان

حوار- محمد مهدي:

''عمرو أبوزيد'' من الناس اللي بتكتب شِعر لأنها بتحب دا، بيصدق اللي بيقوله فبيتصدق، جاي من البلاد البعيدة عن العاصمة اللي هي دمياط عشان يقول الكلمة فتتسمع، وتوصل، وتسكن القلوب، ويبقى من أفضل شعراء جيله بعد صدور ديوانه الأول ''نوفمبر شهر ملائم للموت''.

في حوار مصراوي معاه، اتمشينا في شوارع بلده دمياط من خلال كلامه، اتعرفنا على البداية، سر دخوله عالم الشِعر، حكاية حصوله على جائزة أحمد فؤاد نِجم 2014، وإيه اللي عايز يقوله في ديوانه الجديد ''بث تجريبي'' اللي موجود دلوقتي في معرض الكتاب.

سألناه عن رأيه في موجة الشعراء الشباب بعد الثورة، ودور ''الفيس بوك'' في انتشار الشِعر الحقيقي والمزيف، ومين الألفة في جيله من وجهة نظره، وحلمه بالانضمام لعالم السيما الساحر وإنه يشتغل مع المخرج الكبير ''محمد خان''.
- ليه بتكتب شِعر؟
لأني مابعرفش أعمل حاجة تانية تقريبا، أو لو شئنا الدقة مابعرفش أعمل حاجة تانية وأنا مبسوط، كل إنسان محتاج يقول، الشعر طريقة من طرق القوالة، عشان كده اللي بيبطل يكتب لفترة بيبقى دايما مبرره ( خلاص ماعنديش حاجة أقولها ). .أتمنى يفضل دايمًا عندي اللي محتاج يتقال.

- امتى بدأت؟
زي معظم الناس بتبقى فيه محاولات للكتابة في الطفولة ومرحلة المراهقة ... بس الكتابة بانتظام من حوالي 5 سنين.

- كلمنا عن ديوانك الجديد ''بث تجريبي''؟
( بث تجريبي ) بدأته في فبراير 2014، ودا أول تعاون مع دار دون اللي عندها مشروع أفتكر إنه هيبقى نقلة مهمة في الشِعر.
- إيه أكتر الحاجات اللي ركزت فيها وأنت بتجمع الديوان؟
الديوان كله بيعلي من قيمة التجربة.. الأشياء الناقصة.. ماعنديش أي رغبة أوصل لحاجة.. مش عايز أقول نتايج.. هي تجارب لا أكتر ولا أقل.
- سر الإهداء اللي كتبته لعدد من الفنانين زي محسن محي الدين؟
كل الشخصيات اللي أهديت الديوان ليه هم من أصحاب تجارب غير مكتملة.. ودا معبر عن الديوان.
لمشاهدة برومو ديوان بث تجريبي ..اضغط هنا

- احكي لنا عن جائزة ساويرس الثقافية، لما قدمت كنت متوقع حاجة؟
قدمت على الجايزة في شهر 6 من مبدأ (مش هنخسر حاجة).. ورغم معرفتي بموعد إعلان النتيجة هيبقى في شهر 11.. بس فعلا كنت خرجت الموضوع من دماغي تماما وشبه نسيته.

- لما كلموك عملت إيه؟
لما كلموني وعرفت أني دخلت القايمة القصيرة وديواني واحد من 5 دواوين فازوا وفيه حفلة أول ديسمبر هتتعمل وهيتم الإعلان فيها عن الفائز بالجايزة الأولى ناديت على أمي في الأوضة التانية وأنا مبتهج فسألتني بكل براءة ( إيه نتيجة الجايزة ظهرت؟ ) قلت لها ''أه وأنا واحد من الـ 5 الفايزين''.

- وشعورك لحظة وصولك الاحتفال؟
لما رحت الاحتفال وشفت ''مصطفى إبراهيم'' موجود هناك قلت''ضاعت فلوسك يا صابر'' لأن بصراحة صعب جدًا أي ديوان شعر في السنين اللي فاتت يبقى بقوة وصدق وعظمة ''المانفيستو'' اللي طبيعي يفوز بالجايزة الأولى.
لمشاهدة حفل توزيع جوائز ساويرس الثقافية ..اضغط هنا

- اللي بيكتبوا شعر بيبقى عندهم مخزون قراية وخِبرات.. كلمني عن الكتب اللي أثرت فيك، مش لازم شِعر.
أنا عامة بقرأ بهدف المتعة، ده هدفي الأول والمعرفة بتيجي رقم 2، وبالتالي إجابتي هتبقى أكتر الكتب الممتعة بالنسبالي وهي الأعمال الكاملة لأمل دنقل، حجرتان وصالة لإبراهيم أصلان، الحب في المنفى ونقطة النور لبهاء طاهر، ومائة عام من العزلة لماركيز.
- أكتر الناس اللي بتحب تقرأ لهم شعر من الكبار؟
أمل دنقل.. مش بس بحب أقراله بس، أنا كمان بهتم جدًا أني أعرف أي تفصيلة عن حياته ومشواره، كمان الأساتذة أحمد فؤاد نجم، عبدالرحمن الأبنودي، علي سلامة، نجيب سرور.
- مين أهم شاعر في جيلك من وجهة نظرك؟
بحب ناس كتير جدًا سواء على المستوي الشخصي أو كشعر بيكتبوه وفعلا أي إجابة مهما كانت طويلة هيبقى فيها تقصير.. لكن الأفضل بقى من وجهة نظري ''أحمد الطحان'' وده مش على قد جيلي بس.. أفتكر إنه الألفة في مصر كلها حاليا.
لمشاهدة قصيدة للشاعر احمد الطحان ...اضغط هنا

الثورة ليها فَضل في تكوينك أو ظهورك كشاعر؟
الثورة غيرت كل الناس مع اختلاف النسب.. أفتكر إن ده الحدث الأهم اللي جيلي عاشه وطبيعي يبقى ليه فضل كبير في تكوينا عامة.
- بعد الثورة انتشرت موجة الشعراء الشباب، شايف الموضوع إزاي؟
بص فيه مشكلة كبيرة هنا وهي إن الناس معتقدة إن الموجة دي مثلا سحبت الناس من قراية أشعار ألكسندر بوشكين وخلتهم يقروا كلام خفيف أو تافه زي ما هم بيقولوا، وده مش حقيقي.
الحقيقة إن الهوجة دي خلت ناس عمرها ما فكرت تقرأ أي شيء في حياتها إنها تبدأ.. يمكن دي أول السكة اللي تخليهم يتعمقوا في الموضوع ويمكن يتوقفوا عن المرحلة دي وفي الحالتين مكسب يعني.
- وفين الشعر الحقيقي من كل دا؟
الأذواق مختلفة وكتير جدًا، وكل واحد سواء عنده شيء يقوله أو حتى ماعندوش يقدر ينجح ويلم الناس حواليه في ظل سيطرة ''السوشيال ميديا''.. لكن في الأخر ممكن نقول إن الشعر الحقيقي هيلم حواليه الناس الحقيقية.
- الفيس بوك له علاقة بشهرتك كشاعر شاب؟
بالتأكيد.. الفيس بوك ليه نسبة تتعدى الـ 80 % من نجاح جيلي وظهور أسماء منهم بسرعة للناس.
-لو مفيش فيس بوك، كنت هتعمل إيه؟
كان الوضع هيبقى صعب جدًا.. أنا شخصيا أظن أني كنت هكتب لدايرة معارفي الضيقة وبعد فترة هزهق وأبطل أوريهم وأحتفظ باللي كتبته لنفسي وبعد 20 سنة أبقى أفرج الكشاكيل دي لولادي اللي غالبا برضه مش هيبقوا عايزين يقروها بس هيجاملوني ويقلبوا فيها شوية.. الوضع كان هيبقى مأساوي جدًا.
- نزول عدد كبير من الكتب في معرض الكتاب''كموسم'' دا بيضر بالصناعة ولا شايفه مهم لترويج الأعمال الأدبية؟
الحقيقة يمكن لأني لسه جديد جدًا في الدايرة دي ماقدرش أحدد.. بس أظن إنها فرصة عظيمة لتكثيف الاهتمام بالكتب والقراءة في فترة زمنية قصيرة بتجذب شرايح كتير ممكن جدًا بتفضل طول السنة ماتفكرش تدخل مكتبة.
- ''نوفمبر شهر ملائم للموت'' الديوان الأول ليك.. بدايته، وسر الاسم؟
الديوان اتجمع تقريبا في خلال سنة 2013.. مالوش محور محدد بيدور حواليه غير تجاربي الشخصية، أما سر الاسم محتاج شر كبير بس نوفمبر هو الشهر اللي توفى فيه والدي الله يرحمه والتجربة دي كانت بداية لكل شيء حصل في حياتي بعدها.
لمشاهدة مقطع من ديوان شهر ملائم للموت ..اضغط هنا

- أكتر قصيدة ليكِ بتحبها ؟
عودة شيكابالا.
- إيه اللي جاي بعد الديوان الأخير ''بث مباشر''؟
إن شاء الله قريب جدًا هبدأ كتابة أول سيناريو، عندي شغف كبير أني اشتغل في السينما ويمكن لو كان لسه عندي قابلية للدراسة كنت هدرس إخراج، ولو ربنا وفقني وقدرت أخد خطوات مهمة كسيناريست هبقى حاسس إني فعلا قدرت أوصل للحاجة اللي بحلم بيه.. وأمنية حياتي أكتب فيلم يبقى إخراج العظيم محمد خان.