أطباق مصراوى لافطار اليوم: البيايا الأسبانى وقطايف بالقشطة

قطايف بالقشطة

وقت التحضير : 1 ساعة 10 دقائق

وقت الطهي : 15 دقيقة

الوقت الكلى : 1 ساعة 25 دقيقة

عدد الاشخاص: 4

المقادير

3 x كوب ماء

1 ½ x كوب دقيق

1 x معلقة كبيرة خميرة

½ x كوب سميد (ناعم)

½ x معلقة صغيرة باكينج بودر

الخطوات

أول حاجة هنخلط الدقيق والسميد والخميرة والباكينج بودر مع بعض كويس جدا والأفضل ننخلهم.

بعد كده هنضيف كوب ماء ونقلب كويس جدا وبعدين نضيف كوب تانى ونقلب وبعد كده هنضيف أخر كوب ونقلب كويس.

بعد كده هنغطى البولة ونسيبها ساعة علشان العجينة تخمر.

هنسخن طاسة على النار وهنصب عليها العجين بأى معيار على حسب المقاس اللى عايزينه.

اول ما يظهر على العجين فقاقيع كتير واللمعة بتاعته تروح كده تبقى القطايف استوت.

هنفرش القطايف على صينية تبرد وبعد كده هنحشيها بالقشطة وهنقفلها بالضغط على الأطراف وممكن نرش عليها فستق مبشور وعسل وبكده تبقى جاهزة للتقديم.