"مكنش عندنا أكل وبيدونا الهدوم ببلاش" ماذا قال سعيد صالح عن صديقيه صلاح السعدني وعادل إمام  "فيديو"

كتب-مصطفى حمزة:

تصدر النجم عادل إمام، قوائم تريند محرك البحث جوجل، عقب ما تردد عن مروره بأزمة صحية، وتزامن ذلك مع انتشار شائعة وفاة الفنان الكبير صلاح السعدني، قبل خروج أسرتيهما، لتكذيب تلك الأقاويل.

ومع تزايد الشائعات التي تطارد الزعيم عادل إمام، وصديقه الفنان صلاح السعدني صاحب لقب "العمدة"، نرصد هنا، ماذا قال الصديق الثالث لهما الفنان الراحل سعيد صالح، عن أوجه الشبه والفرق بينهما؟.

الفنان الراحل سعيد صالح، خلال ظهوره في برنامج "ساعة صفا"، مع الفنانة والإعلامية صفاء أبو السعود، قال، :" طول حياتي لي 3 أصدقاء عمر، هم عادل إمام ، وأحمد ماهر الشهير بـ "ماهر تيخة"، وصلاح السعدني، دي شلة العمر وكان زمان صحفي كتب "سعيد كالسعدني"، إن احنا الاتنين من طينة واحدة وشكل واحد وحكاية عمر واحدة".

وتابع،:" في الشلة بتاعتنا، صلاح كان المتكلم والمتحدث اللبق اللي فينا، بس هو مكنش له دعوة بالمسرح ولا بالسينما، أنا وعادل دخلنا وتفوقنا في المسرح والسينما، صلاح بقى خد كاريير المسلسلات، فبقى مندوبنا الدائم في التلفزيون، وعمل أرضية ممثل من أكبر وأهم الممثلين في تاريخ التلفزيون العربي ".

سعيد، أضاف،:" أنا وعادل لو كنا دخلنا معاه الدراما والمسلسلات، مكناش هنعمل أكثر من اللي عمله صلاح ومكناش أصلا هنصل للي عمله، أدوار كثيرة جدا كنت أنا مرشح لها، واعتذرت فعملها صلاح، وبقى بالنسبة لي كأن سعيد صالح هو اللي عملها، وحبيتها من صلاح زي ما كنت هحبها من نفسي وأكتر كمان، منهم "ليالي الحلمية" و"أرابيسك"، كنت أنا هعمل العمدة وحسن أرابيسك وعملهم صلاح، وكان جميل جدا وأجمل مني لو عملتهم".

وأكمل، :" هو كان الضلع الثالث بتاعنا أنا وعادل في الفن، هو اللي كان سادد المسلسلات لوحده".

وعن ذكريات البداية، تحدث سعيد صالح، وقال:"صلاح زمان كان رفيع جدا وأنا كمان، شوفينا في مسلسل اسمه (هارب من الأيام)، كنت أنا وصلاح رفيعين ومسلوعين ومكنش فيه لا أكل ولا شرب ولا لبس، هما قميص وبنطلون اللي حيلتنا ولا حتى كان عندنا جزم نلبسها، فاستغلينا المسلسلات بتاعة الفلاحين، قعدنا منعملش غيرها في البدايات لإن الهدوم فيها كانت ببلاش، كانوا، بيدونا في التليفزيون جلاليب فكانت حلوة كمان عشان تداري رفعنا ".