Couples الدوري المصري.. "اختارت اسم مكة أول ما تعرفنا ".. قصة حب محمد صلاح وزوجته ماجي (صور وفيديو)

كتبت - نهى خورشيد:

رغم الانتقادات وحديث مواقع التواصل الاجتماعي الدائم، لم يتخلي محمد صلاح نجم منتخب مصر وليفربول الإنجليزي عن حب طفولته وزوجته "ماجي" التي بدأت معه رحلة ناجحة ومشواره الكروي الأبرز في تاريخ الرياضة المصرية.

ويعتبر ظهور محمد صلاح في أي مباراة يمثل أهمية للشارع الرياضي المصري باعتباره من أنجح اللاعبين على الساحة خلال السنوات الأخيرة، لذلك أصبحت عائلته وحياته الاجتماعية محط أنظار الملايين من المتابعين.

وبدأت قصة صلاح وماجي منذ الطفولة، ليكمل الثنائي مشوارهما معاً، بعدما احتفلا بزفافهما في 18 ديسمبر 2013، وأنجب الثنائي "مكة وكيان".

حكي محمد صلاح قصة تعرفه بماجي قبل زواجهما في تصريحات عبر برنامج "صاحبة السعادة":" قصتنا بدأت من المدرسة، لأننا كنا من بلد واحدة، ولكن مكانش ساعتها بنتكلم كتير، بس بدأنا نتعرف على بعض بشكل أكبر في الجامعة".

وأضاف:"بعد الجامعة ارتباطنا رسمي وده كان في الفترة اللي محترف فيها في صفوف بازل، واتخطبنا بعدها واتجوزنا قبل لما احترف في تشيلسي و كانت وش السعد عليا".

وتابع حدييثه:" ماجي مش بتركز مع الكلام اللي بيتقال عن علاقتنا و مش بتتعامل مع السوشيال ميديا كتير، وعارفه طباعي وأني بحب الهدوء والاهتمام بشغلي بس".

وواصل الفرعون المصري:"هي اهم حد في حياتي وفي بيتي، وهي مهتمة باسرتنا والبيت أكتر، ساعات ببقي مضغوط و حالتى النفسية مش أحسن حاجة فهي بتهم بيا وبكل حاجة وطبعاً مش هقدر أوفيها حقها".

وعن تسمية ابنته قال صلاح:"ماجي اختارت اسم مكة من أول لما تعرفنا على بعض قالتلي لو خلفنا بنت هنسميها مكة، وأنا قولتلها عقبال لما نيجي نتجوز ونخلف هيكون الناس كلها سمت الاسم ده"

وأكمل:"إنما هي اللي سمت البنات، حتي ساعة كيان قالتلي ده اسم جديد معترضتش وقولتلها تمام".

وعن تأقلم أسرته خارج مصر قال في تصريحات لبرنامج "الحكاية":"مكة بتتكلم بـ accent البريطاني دلوقتي، بتتريق عليا أنت بتتكلم عربي، هما متأقلمين ومراتي حبة البلد مش زي لما كنا في إيطاليا الموضوع كان صعب بالنسبه لها بس هي بتحب إنجلترا".

وأتم حديثه:"ماجي واخدة بالها جداً من مكة في المدرسة وبتروح لها كل شوية علشان تشوفها ماشية ازاي ويتطمن عليها، مكة ذكية وشخصيتها قوية جداً".

ونتيجة لعلاقاتهما القوية والمترابطة والتي تعتبر مثال للزواج الناجح، ظهر الثنائي في العديد من الإعلانات آخرها إعلان رمضان لشركة فودافون، وخطف مشاهدهما على كلمات أغنية "جنبي في كل الأوقات" رواد ومتابعي مواقع التواصل الاجتماعي.