جميلة عزيز: صاحبتي تخلت عني في مرضي.. وقررت أتحجب بعد شفائي

القاهرة- مصراوي:

كشفت الفنانة جميلة عزيز، تفاصيل دخولها الوسط الفني، بجانب الكشف عن تفاصيل إصابتها بوعكة صحية كبيرة خلال الفنرة الماضية وارتدائها الحجاب.

وقالت جميلة عزيز، في لقائها مع المذيعة إنجي هشام، في برنامج "المنسي" الكعروض عبر قناة "هي": "بدأت الفن مع الفنان العظيم العبقري الأستاذ محمد صبحي، مقدرش أنكر جمايله عليا هو اللي حببني في الفن، على الرغم من أنه شديد في شغله، لكن شدته دي بتحبب الفنان في الفن وبتعلمه، كانت أول خطوة بالنسبة ليا خطوة حلوة، وهو اللي رشحني لـ مسلسل يوميات ونيس".

وعن تفاصيل وعكتها الصحية، قالت جميلة عزيز: أخر عملين ليا كانوا أفراح إبليس والشوارع الخلفية، وبعدين جاتلي وعكة صحية وخدت عهد بيني وبين ربنا إني أطلع من الوعكة دي وأتحجب، كانت وعكة صحية شديدة جدًا وكنت فيها لوحدي، وكان تعبي النفسي أكتر من الصحي".

وتابعت: "أنا أمي متوفية ووالدي راجل كبير في السن، فمكانش عندي غير ربنا، والناس اللي عندهم ضمير زي الدكتور أشرف زكي، والنقابة كانوا واقفين جنبي وبيسألوا عليا".

وأضافت: "كان فيه صديقة ليا حميمة في الوسط الفني هي فنانة وبناكل وبنشرب مع بعض، وصلها أني تعبانة ومرفعتش سماعة التليفون تسأل، مع أن كان في خلاف بسيط جدًا بيني وبينها زي أي أصحاب ولكن ساعة المرض المفروض ينسى كل حاجة، وأقل حاجة ارفعي السماعة وادعميني دعم نفسي، والدعم الفني ده بيخفف".

واستكملت: "ولغاية دلوقتي مفيش أي تواصل بينا، ولما حصلها ظروف سألت عليها وقولت لوالدتها أنا مش هقدر أجي ليها دلوقتي لأني تعبانة وباخد دواء، قالتلي سلامتك وهنجيلك، ومحدش جه، وكان عندي أمل أنها تيجي وتسأل عليا، عمري ما هنسى، أنا وقفت جنبها وقفات جدعنة كتير ومبتأخرش عليها".

وبرنامج المنسي، من تقديم إنجي هشام على شاشة قناة هي، ويُعرض يوميًا في تمام الساعة العاشرة مساء، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بداياتهم وتفاصيل مشوارهم والتحديات التي واجهتهم على مدار مشوارهم الفني.

اقرأ أيضا

محمد حماقي: "مش هجوز بنتي وأنا أوحش من عادل إمام في عريس من جهة أمنية"

محمد حماقي: "بصراحة مش بحب حد ينتقدني"- فيديو