محمد سامي: وفاة أختي أثرت فيا وبسببها بخاف من الموت والمرض

كتب- هاني صابر:

علق المخرج محمد سامي على شهوة جمع المال، قائلًا: "معنديش شهوة جمع المال وبشوف هو تقييم للفنان لأني من أسرة غنية مش بسيطة، وعندي شهوات أهم من الفلوس وهي جمع الحيوانات وعندي فوق الـ 1000 حيوان".

وتابع سامي، ببرنامج "أسرار": "مش بخاف من الحسد، ومبحبش فكرة الشيوخ يعني إيه أجيب شيخ يقرأ لي وأمي موجودة بتقرأ لي، معنديش مشاكل مع حد في المشايخ، لكن مبحبش أتكلم عن المشايخ ولا السياسيين، وعلاقتي بربنا بشوفه البديع الرحمن، لأنه خلق الحيوانات والألوان اللي أنا بحبها، وبطلب من ربنا طلبات تضحك، زي لو عربيتي عطلت أقوله مشيها، وممكن وأنا بعمل مشهد بطلب من ربنا إنه يبقى تريند”.

وأضاف: "عندي شراهة للنجاح، نفسي أموت ناجح ومش منسي، وبخاف من الموت جدًا ومن المرض، لأن عندي أختي ماتت سنة 2005 كان عندها سرطان وبعد ما خفت منه مرضت تاني وماتت، هي كانت صيدلانية وموهوبة جدًا في الكتابة والشعر، لو موجودة كنا هنبقى كومبو هي تكتب وأنا أخرج لأنها محضرتش وأنا مخرج، كانت مثقفة أوي وموهوبة أوي".

واستطرد قائلًأ: "أختي كانت بتتعالج برا في أمريكا من السرطان، وكان الدكتور يهودي، قال لأبويا مطلوب مبلغ ضخم ووالدي وافق, والدكتور قاله أنا بصراحة بقولك رقم كبير عشان ترفض، وجربوا معاها كل حاجة حتى الحاجات زي بول الإبل في مرسى مطروح، لما راحت هناك رفضت التجربة ورجعت من مطروح ميتة في العربية".