رامز جلال يسخر من نهال عنبر ونجلها: بيهربوا جمال

القاهرة- مصراوي:

سخر الفنان رامز جلال من ضيفي مقلبه اليوم "رامز نيفر إند"، الفنانة نهال عنبر ونجلها المخرج حسام الحسيني.

وقال رامز "إيه ده يا نهال جاية لابسة بيجاما، إيه اللي انت لابسه ده رايح مع مامي حديقة الأطفال، تيشيرت ولا مريلة مطبخ ده، بنطلون ولا مشنتين، كإنهم اتمسكوا بيهربوا جمال، دي دقن سواق توك توك يا حسام".

اختار الفنان رامز جلال للفنانة نهال عنبر وابنها المخرج حسام الحسيني، مقلب الغسالة، وأضاف "العائلة المفككة.. الغسالة سامحني يا حسام انت والحاجة مضطر اعاملكم بطريقة فجة، حلقة من أجل أبنائي.. ابناء وقتلة".

وقال رامز في تقديمه لضيفي الحلقة "مُقدم على تحدي جديد في سجل الإجرام، هتجرد من كل مشاعر العطف اللي مش موجودة جوايا، جايب أم وابنها، هحرم الأم من ضناها، اللي هيحصل النهاردة هيعمق الروابط الأسرية كل واحد فيهم هيعرف قيمة التاني لما الابن يشوف الام وهي بتنازع هيتأكد أنه مالوش غير حضن أمه، والابن هيقول الحقيني يا ماما وهتفهم إن في الأخر مالهاش غير بيتها وولادها".

برنامج "رامز نيفر إند" يعرض على قناة " MBC مصر" في تمام الساعة 6:10 مساء.

ووقع ضحايا برنامج رامز جلال في الحلقات السابقة لاعب الأهلي محمود كهربا، ولاعب الزمالك السابق إمام عاشور، والمذيعة ياسمين عز والنجوم: محمد رمضان وأحمد السقا ومحمد فؤاد ومحمد فراج وبسنت شوقي ومصطفى كامل، ونسرين أمين.

جدير بالذكر على مدار الأعوام الماضية نجح رامز جلال في حجز مكانة متميزة على المائدة الرمضانية، إذ ينتظر الجمهور برنامج المقالب الذي يقدمه، ليشاهد رد فعل النجوم الذين يتم استضافتهم، وحمل برنامج العام الماضي اسم "رامز موفي ستار".