عمرو زكي يكشف السبب الحقيقي وراء فشله في الاحتراف ونجاح محمد صلاح

كتب- مينا غالي:

قال عمرو زكي، نجم منتخب مصر والزمالك الأسبق، تعليقًا على سبب نجاح محمد صلاح في الاحتراف بينما هو لم ينجح، إن النجاح له عوامل، مضيفًا: "عارف طبعًا إن بداياتي كانت أقوى من محمد صلاح، وكل حاجة عملتها غلط لو رجع بيّ الزمن مش هعملها، وحتى بأقولها رسالة لكل الناس، والنصيحة اللي هقولها لكل لاعبيي مصر: لو هتروح إعارة ده مشروع فاشل، لأن النادي هو اللي بيستفيد".

وأضاف زكي خلال حواره مع بسمة وهبة ببرنامج العرافة على قناة المحور: "لأن اللاعب اللي بيطلع على سبيل البيع بيبقى عنده استقرار، وبيبقى عارف إن دي خلاص حياة هيعيشها.. اللاعب كمان لما يطلع وهو صغير بتفرق كتير عكس ما يطلع وهو كبير.. أنا جاي النهاردة حلقة مع حضرتك عكس ما أكون متعاقد معكِ على 30 حلقة.. أنا لو حاجة ضايقتني ممكن أستحملها علشان بكرة أو بعده، لكن كضيف ممكن أسيب الحلقة وأمشي".

وتابع زكي: "اللي بقوله بس رسالة أن اللاعب لما بيطلع وهو مش صغير وهو مش نجم بتبقى نجوميته وفلوسه وشهرته هناك، وبنصح أن يكون في مرونة شوية من الأندية علشان المنتخب.. محمد صلاح النهاردة لما بيمثل مصر كلها بيبقى فخر لينا كلنا.. الناس كلها اللي راحت قبله سواء هاني رمزي أو ميدو أو أحمد حسن أو عبدالظاهر السقا، كلهم لم يكونوا لاعبي أهلي وزمالك".

وواصل: "أقصد المغريات هنا لا تساعد، لكن أنا لما طلعت كنت لاعب في نادي الزمالك، وكنت هداف الدوري الإنجليزي، أقوى دوري في العالم.. الفرصة مش أكبر مني.. وأنا طول مانا عايش هغلط لكن هفضل أعترف أن دي من أكبر أخطائي.. لكن طول ما في نفس في أمل".