والدة الشهيد محمد شويقة عن مشهد "الاختيار": قلبي اتخلع.. وابني مات بشرف

كتبت- منال الجيوشي:

"قلبي اتخلع وأنا بتخيل ابني اتوجع إزاي، وقت ماراح يفدي زمايله، ومن جوايا كنت بتقطع لأني حسيت بوجعه، بس فرحت لأن ابني فدا بلده ومات بشرف".. بهذه الكلمات بدأت "عزة" والدة الشهيد محمد أيمن شويقة حديثها لمصراوي.

وأكدت أنها تلقت عددا كبيرا من الاتصالات يوجهون لها التحية ويترحمون على "محمد"، الذي جسد شخصيته في مسلسل "الاختيار" الفنان أحمد مصطفى.

وتابعت: "من ساعة المشهد عيني ماغفلتش، أنا فخورة وفرحانة وحاسة بالعزة اللي علمها لينا ولبلده، بس صرخة الجندي وهو رايح يحضن التكفيري عشان يفدي زمايله، خلتني أنهار وكأن لسه الخبر واصلني، يا رب ساعتها مايكونش ابني اتوجع، وتكون روحه طلعت لربنا وهو مش حاسس بأي وجع".

وعن اليوم الأخير للشهيد، قالت: "محمد كان في أعز حالات الانتصار، وقبل يوم واحد من وفاته كلمني، وطلب مني عمل محشي وكيك وإحضار حذائين يشبهان بعضهما، وحينما سألته عن السبب قال (هدية لزميلي عشان اللي يموت فينا شهيد يفتكر التاني)".

واستكملت: "انقبض قلبي، وطلبت منه ألا يتحدث بهذا الشكل، وطلبت منه ألا يترك سلاحه فالجيش لا يخدم به إلا الرجال"، مضيفة: "أنا حاسة إن مسلسل الاختيار مش معمول عشان الشهيد المنسي، ده معمول عشان محمد ابني، وأنا راضية بقضاء الله، ابني لو كان في حضني ومكتوب له يموت كان هيموت، بس الحمد لله إنه مات بشرف، بس أنا حضرتله الحاجة اللي هو طلبها، لكن مجاش".