"شافني أنا وخالته من غير هدوم في المطبخ".. نص التحقيقات مع قاتل ابنه الصغير في الإسكندرية
محكمة
الإسكندرية – محمد عامر:
عاقبت محكمة جنايات الإسكندرية وبإجماع الآراء عامل بالإعدام شنقًا، لاتهامه بقتل نجله البالغ من العمر 7 سنوات عمدًا، باستدراجه إلى مكان نائي وألقاه حيًا في الترعة ليموت غرقًا، بعدما اكتشف الأخير علاقة والده المحرمة مع خالته.
صدر الحكم برئاسة المستشار جمال زغلول البغدادي، رئيس المحكمة، وعضوية كل من المستشار سامح عبد الوهاب السيد عوض الله، والمستشار إيهاب سلامة محمد شاهين، والمستشار عمر أحمد فتحي علم الدين، وسكرتير المحكمة حسني عبد الحليم.
وينشر "مصراوي" أجزاء من نص أقوال المتهم أمام جهات التحقيق كالتالي:
س. ما هي الحالة التي أبصركم عليها نجلك مع خالته آنذاك؟
ج. المتهم: "احنا كنا في المطبخ نايمين مع بعض وكنا خالعين هدومنا اللي تحت كلها".
س. ما هي كيفية اكتشاف نجلك المتوفى إلى رحمة مولاه لتلك العلاقة؟
المتهم:" هو دخل المطبخ كان فاكر إن في حد من عيال خالته جوه وكان داخل يلعب معاه.. فشفنا واحنا نايمين مع بعض وقلعين هدمنا اللي تحت".
س. ما التصرف الذي بدر من نجلك حال رويتكم آنذاك؟
المتهم: "هو زي ما يكون فهم اللي احنا بنعمله وراح داخل على الأوضة وهبد الباب".
س. ما التصرف الذي بدر من المدعوة "ن.ف" خالته آنذاك؟
المتهم: "هي معملتش أي حاجة غير أن هي لبست هدومها بسرعة وسألتني هو ده حمو وانا فلتلها أيوه".
س. ما التصرف الذي بدر منك آنذاك؟
المتهم:"أنا لبست هدومي بسرعة ودخلت اتشطف ودخلت أبص عليه"
س/ وما الحالة التي أبصرت عليها نجلك آنذاك؟
المتهم :"عبال ما أنا اتشطفت ودخلت أبص عليه لقيته نايم".
س. وما التصرف الذي بدر منك عقب ذلك؟
المتهم:"أنا رجعت تاني المطبخ أنا وخالته وكملنا اللي كنا بنعمله وخلصنا ودخلت نمت".
س. وهل دار فيما بينك وبين نجلك ثمة حوار آنذاك؟
المتهم: "لا هو كان نام واتكلم معايا تاني يوم".
س. وما سبب ومناسبه ان يدور فيما بينكم ثمة حوار؟
المتهم:"علشان هو كان بيلومنى على اللي شافه وكان فاكر أن في مشاكل بيني وبين أمه وكان مضايق واتكلمنا أنا وهو تاني يوم بعد ما خلصت شغل هو كان معايا وأنا شغال وبعدها واحنا قعدين على القهوة اتكلمنا".
س. ما الحوار الذي دار فيما بينكم آنذاك؟
المتهم: "أنا سألته هو أنت كنت صاحي امبارح بالليل فرد عليا وقالي ايوه وشفتك أنت وخالتي مع بعض وقالي أيه القرف اللي أنت عملته ده وعشان أنا كنت متعود إني بتكلم معاه كأنه واحد صاحبي فرديت عليه وقلت له أيوه كانا وقفين علشان كان في مشكلة وأنا كنت بحلها.. فراح مشوح لى بأيده وضحك وقالى يا راجل وبعدها سألني هو أنت سبت ماما وفي مشاكل بينكم علشان تعمل كده مع خالتي فانا قلت له لا دي أخر مره ومش هعمل کده تاني".
س. ما هي الترتيبات والتدابير التي اتخذتها للتخلص من نجلك؟
المتهم: "أخدته وطلعت على الحضرة عشان في ملاحة هناك رحت بصيت عليها مريحتنيش عشان حسيتها مش غويطة فقلت له تعالى يا حمو نتحرك وأخدته وطلعنا على وحده تانية في غيط العنب برده مجتش معايا اتحركت بيه على ملاحه في بشاير الخير تحت كوبري القباري وبرده حسيتها مش مريحة ومش هعرف اخلص منه فيها فتحركت بيه ووقفت ناحية كمين كارفور ونزلت انا وهو وفضلنا نتفرج على المياه شويه..".
وتابع المتهم:" هو نزل يلعب برجله في المياه شويه بس المكان ده كان فيه مشكله لان كان في طينة في المياه والمياه مش غويطة ومرتحتش للمكان ولقيت انى مش هعرف اخلص منه فيه هو في سعتها قالي أنا سقعت يا بابا وأنا كنت ببص على المكان حوليا فلقتها برده حته مش مريحة فتحركت من قدام كمين كارفور ورحت على ترعه قبل شارع نادى أكاسيا ونزل هناك شويه يدوب نزل رجله على معديه واحد صياد راكب عجله لقيته بيقولي أنت منزله هنا ليه المياه مش نضيفه لو عايز تنزله نزله في الترعة اللي في شارع أكاسيا علشان انضف وساعتها كان في فرصه أن أنا أخلص منه بس لما الراجل ده عدى مكنش ينفع انفذ فأخدته ورحنا على شارع أكاسيا".
وأضاف المتهم:" حسيت المكان ده مناسب علشان الشارع فاضي والترعة شكلها غويطه ينفع اخلص منه فيها فأول ما نزل الشبشب بتاعه اتزحلق منه في المياه فراح طالع تاني وساعتها هو سألني يعنى انزل هنا يا بابا هنا فانا قولت له انزل يا حبيبي متخفش وراح نازل المياه وفضل يلعب شويه وبعدها هو كان عايز يطلع علشان كان في طوبة بيخبط فيها في رجله فمسكته علشان أطلعه ومسكته من أيده الاثنين ورحت شايله من أيديه ورحت حدفته بعد الطوبة علشان بعد الطوبه المكان غويط".
س. ألم تفكر حتى في أمر ارتجاعك عن ارتكاب تلك الجريمه؟
المتهم: "أنا بصراحة مجاش في بالي انزل اجيبه".
ترجع وقائع القضية رقم 14151 لسنة 2023 جنايات قسم شرطة محرم بك، عندما تلقت الأجهزة الأمنية بمديرية أمن الإسكندرية إخطارًا من ضباط القسم يفيد العثور على جثة الطفل "م.ع.أ" 7 سنوات.
وتبين من التحقيقات أن والد المجني عليه المدعو "ع.أم" عامل، بيت النية وعقد العزم على إزهاق روح نجله، واستدرجه يوم الواقعة إلى أحد الأماكن النائية مدعيًا تنزهما سويًا وتوجه إلى مكان الواقعة.
ووفقًا لأوراق القضية، دفع المتهم نجله المجني عليه بمجرى مائي ترعة تاركًا إياه يغرق دون أن يساعده قاصدًا إزهاق روحه حتى أيقن أن روحه قد فاضت إلى بارئها.
وباستدعاء المتهم وتضييق الخناق عليه، قرر بارتكابه الواقعة وذلك لعلم الطفل بإقامته علاقة غير مشروعة مع شقيقة زوجته خشية أن يخبر أحد ويفتضح أمره.
تحرر محضر بالواقعة بقسم شرطة محرم بك، وقررت النيابة العامة إحالة المتهم إلى محكمة جنايات الإسكندرية التي أصدرت حكمها المتقدم على المتهم.
ــــــــــــــــــ
اقرأ أيضا:
بسبب علاقة محرمة.. الإعدام لقاتل نجله في الإسكندرية
جريمة يشيب من هولها الولدان.. رئيس جنايات الإسكندرية لقاتل ابنه: روح الضحية تطالبنا بالقصاص
فيديو قد يعجبك:
