بعد فوزها ببطولة أفريقيا.. منار: لقيت نفسي في المصارعة وطموحي ميدالية أولمبية - فيديو وصور

البحيرة - أحمد نصرة:

استطاعت البطلة منار المصري، ابنة البحيرة أن تضع قدمها على طريق البطولة واعتلاء منصات التتويج بعد فوزها بالميدالية الذهبية في بطولة أفريقيا للمصارعة للناشئين والتي أقيمت مؤخرًا بالمغرب.

"مصراوي" التقى البطلة المصرية للحديث عن إنجازها، وخططها وطموحاتها لمستقبلها في هذه اللعبة.

تقول البطلة منار "اتدربت المصارعة بالمصادفة، كنت رايحة مركز الشباب أشوف أي لعبة أشترك فيها وكان فيه تمرين مصارعة، فعجبتني اللعبة جدا وقررت ألعبها".

وتضيف منار " أسرتي شجعتني على ممارسة اللعبة وبابا قاللي طالما بتحبيها كملي فيها، وكل أهلي بيدعموني وهما سبب النجاح إللي حققته".

وتوضح البطلة المصرية " فيه ناس كتير مفكرة إن لعب المصارعة باعتبارها لعبة بدنية عنيفة كان ليها تأثير سلبي عليا، ولكن ده تصور غلط، بره التمرين أنا بنت عادية وتعاملاتي وسلوكياتي زي أي واحدة في سني".

وتكمل: "بتدرب بمعدل 4 ساعات يوميًا، ومفيش مشكلة خالص في تحقيق التوازن بين التمرين والدراسة، أنا حاليًا في 3 إعدادي وبحاول إن مفيش حاجة تطغى على التانية".

وتكشف منار عن أحلامها:" طموحاتي وأحلامي كتيرة جدًا أنا لسه في أول المشوار، ونفسي أقدر أطور مستوايا وألعب في الأولمبياد وأفوز بميدالية عشان أرفع إسم بلدي".

ويقول سعيد المصري - والد البطلة: " منار جات وقالتلي أنا عاوزة ألعب مصارعة يابابا، ولما لقيت في عينيها رغبة كبيرة وتصميم على اللعبة، مرضيتش أقف قدام رغبتها، والحمد لله رفعت راسي وكانت عند حسن ظني بيها"

ويقول الكابتن أيمن يونس - أحد مدربي البطلة منار: " كنا نتوقع حصول منار على ذهبية أفريقيا، والتحدي الأصعب بالنسبة لنا كان تأهلها وترشحها لتمثيل مصر لوجود لاعبات مصريات مستوياتهن أعلى من لاعبات أفريقيا".

من جانبه قال الدكتور إبراهيم خضر، وكيل وزارة الشباب والرياضة: "منار إحدى ثمار مشروع البطل الأولمبي، وهو مشروع واعد يحظى بدعم مباشر من الدكتور أشرف صبحي، وزير الشباب والرياضة، وسيكون له أكبر الأثر في تخريج أجيال من الأبطال الرياضيين".