الأول ثانوية عامة بأسيوط: "أمي بكت من الفرحة"

أسيوط - محمود عجمي:

قال أحمد عبدالناصر محمد أحمد عطاي، مدرسة المستقبل، والحاصل على المركز الأول في نتيجة الثانوية العامة مكرر بمجموع 410 درجات: "في البداية لما قالوا لي قلت يمكن ده تشابه أسماء أو مخدوش بالهم، وفرحت جدًا جدًا الحمد لله بالنتيجة.. ماما بكيت وفرحنا كلنا".

وأضاف الطالب أحمد عبد الناصر: "أما فكرة المذاكرة في زمن الكورونا فأغلب المواد كنا مخلصينها لحد نص شهر 3 ما عدا مادة أو 2، فاللي مخلصناهوش لما حذفوا حذفوا أكتر من اللي كان فاضل لينا فيهم فإحنا كده كنا بنراجع مش بنذاكر من الأول، وفترة أزمة كورونا كنت براجع المواد مش تعتبر مذاكرة، في مدرس كان حب يراجع معانا المادة على فيديو لايف بس التجربة منجحتش بسبب النت والصوت، عامة كله كان قاعد في البيت محدش بينزل".

وأشار أحمد: "قبل الامتحانات من نص رمضان كده كنت بذاكر كويس، بس فترة الامتحانات كنت بذاكر أقل عن قبل، وكنت بنزل الشارع كمان، بس امتحان الأحياء والإنجليزي كان صعب شوية. أنا نفسي أدخل طب أسيوط، بس عشان في منح وحاجات فأنا لسه هدرس الموضوع وأشوف، زي إخواتي أتفوق"‎.

وأعلن الدكتور طارق شوقي، وزير التربية والتعليم والتعليم الفني، نسبة نجاح الثانوية العامة بلغت 81.5%؛ وحصل 3 طلاب وطالبة بمحافظة أسيوط على المركز الأول مكرر شعبة علمي علوم.​