بالصور.."نصبة الشاي" بديل المقاهي المغلقة بشوارع البحيرة

البحيرة - أحمد نصرة:

المقاهى من الأنشطة التجارية التي شملها قرار مجلس الوزراء بالإغلاق التام، ضمن الإجراءات الاحترازية لمواجهة فيروس كورونا المستجد، إلا بعض أصحاب المقاهي والعاملين بها لم يمتنعوا عن مواصلة النشاط عن طريق إنشاء "نصبة شاي"، منهم من وضعها أمام مقهاه المغلق، ومنهم من انزوى بها بأحد الشوارع الجانبية المحيطة.

"اعتبرونا ديليفري أو تيك أواي"، علق "شريف" قهوجي، على انتقاد البعض لانتشار نصبات الشاي في الشوارع، مطالبًا بعدم محاربته في رزقه ورزق أولاده، بحسب قوله.

ويقول "عبد السلام"، صاحب نصبة: "قبل ما ندوّر على المكسب، إحنا بنقدم خدمة للغلابة، كوباية الشاي أول حاجة العامل بيدور عليها الصبح علشان مزاجه يتظبط ويعرف يشتغل، بعد القهاوي ما قفلت الناس فضلوا يومين بيلفوا حوالين نفسهم مش عارفين يعملوا إيه".

ويشكو "سعيد" صاحب مقهى: "إحنا أكتر ناس اتضررت من الحظر، مفيش حد قفل طوال الوقت غيرنا، هناكل ونشرب منين، والموضوع لسه شكله مطول، هنعمل إيه بس".

"الكافيتريا اللي شغال فيها قفلت بسبب قرار الحظر، وصاحب المكان قال مش هيقدر يدفعلنا مرتب طول ما هو قافل، ملقتش قدامي غير إني أعمل النصبة دي لغاية ربنا ما يفرجها"، يوضح "محمود" قهوجي، سبب وقوفه على نصبة شاي بالشارع.

ويقول "سمير" بائع خضروات: "مش معقول هنفضل طول اليوم نشتغل من غير ما نشرب كوباية شاي، بعد القهاوي كلها ماقفلت مفيش قدام أصحاب المحلات والفروشات غير إنهم ياخدوا شايهم من النصبة".

ويقترح "مروان" محاسب: "من وجهة نظري الأفضل يسمحوا للقهاوي تفتح وتقدم المشروبات تيك أواي في أكواب ورقية من غير ماحد يقعد عليها، وكده هيبقى أنضف وأفضل صحيًا من النصبة الموجودة بالشارع والمعرضة للتلوث".