طبيب كفر الشيخ المزيف: "مقولتش أنا دكتور وشغلي استشارات لوجه الله"

كفر الشيخ - إسلام عمار:

أصدرت محكمة جنايات كفرالشيخ اليوم السبت، حكمها بالسجن 5 سنوات لطبيب المخ والأعصاب المزيف بحي سخا.

وخلال جلسة النطق بالحكم، وقف المتهم في القفص الحديدي، مرتديًا قميصًا وبنطالًا أسودين، تاركًا لحيته، في الوقت الذي حلق فيه شاربه، وأمسك مصحفًا في يده، يراقب ما يحدث داخل القاعة.

"مصراوي" اقترب من المتهم، الذي فجر مفاجأة، نافيًا انتحاله صفة طبيب، وقال: "أنا مش دكتور و ماقولتش إني دكتور أنا بتاع أو تو سي، استشارات طبية يعني، عرض على الطرابيزة زي مابيقولوا".

وأضاف: "بدايتي في تقديم الاستشارات لما لقيت واحد بيخبط على باب بيتي، وبيقولي أنا تعبان وقدمت له اللي يفيده زي ما واحد بيشتكي من إسهال أو صداع، ولما لقيت كتير بيحتاجني استأجرت مكان في سخا للاستشارات وكله لوجه الله".

ونفى المتهم خلال حديثه لـ"مصراوي"؛ تقاضيه مبالغ مالية من مواطنين مقابل علاجهم.

وقال: "لم أتقاضى مليمًا من أحد، وعايز حد يثبت أني أخدت منه مليم واحد ومفيش شكوى أو محضر ضدي".

وقال أيضا موجها كلامه لمراسل "مصراوي": "مش ذنبي أن حد بيقولي يا دكتور، ده لو واحد معاه دبلوم وبيشتغل في صيدلية الناس بتقوله يا دكتور.. وكمان فيه ناس بتعالج الأمراض بالأعشاب وفيه ناس بتعالج الأمراض بالخشبة وهو فيه طب بيعالج بالأعشاب أو بالخشبة، ومع ذلك في اللي بيقولهم يا دكتور".

واختتم كلامه قائلا: "أنا زعلان من الإعلام قالوا إن سني 38 سنة وأنا عندي 30 سنة بس، وقالوا كمان إني بمارس الطب بقالي 9 سنوات وده محصلش يا دوب أنا اخدت شقة إيجار لمدة سنة عشان أقدم استشارة للناس وأقدم لهم اللي أعرفه في الطب".

وفي السياق قال المتهم لرئيس المحكمة المستشار بهاء الدين المري: "طبيب شهير أوصاني وصيتين أول حاجة قالها لي كمل تعليمك والثانية خلي بالك من الناس تقدر تفيدهم باللي تعرفه في الطب".

وقضت محكمة جنايات كفر الشيخ "الدائرة الأولى"، اليوم السبت، بمعاقبة طبيب المخ والأعصاب المزيف حضوريًا بالسجن لمدة 5 سنوات، ومصادرة المحررات المزورة المضبوطة بحوزته، وإلزامه بالمصاريف الجنائية.