تقرير.. الظلام يخيم على قرى بدمياط في أول أيام عيد الأضحى

دمياط - محمد عبده:
استقبل أهالي محافظة دمياط أول أيام عيد الأضحى المبارك بحالة من الغضب بسبب تكرار انقطاع التيار الكهربائي في عدد من القرى لفترات زمنية تصل إلى خمس ساعات متصلة وخاطب بعضهم غرفة الشكاوى بديوان عام المحافظة دون جدوى.

وعاش المواطنون في ظلام دامس ليلة أمس في عدد من قرى مركز كفر سعد إلى جانب قرية السنانية ومدينة كفر البطيخ.

وقال محمود حفظي، من الأهالي "نستقبل العيد واحنا مش شايفين وبعتنا للمحافظ شكاوى وفاكسات وبعتنا لرئيس الوزراء لكن مفيش أي حل"، وتابع قوله "الكهرباء كل يوم تقطع مش أقل من 5 ساعات وتيجي ساعتين وتغيب تاني زيهم، وده العادي لكن احنا في عيد ومفيش حد يراعي الناس والمهم عند شركة الكهرباء الدفع والفواتير تيجي غالية لكن بياخدوا فلوس على الفاضي".

ويؤكد أحمد البهلول، من قرية السنانية، "عندنا الموضوع مختلف لأن مفيش كهرباء ولا مياه، أول يوم عيد الأضحى مفيش خدمات رغم إن ده أقل حق من حقوقنا ولا بنشوف قدامنا بالليل وكل لما نشتكي يقولوا هنحل وهنزود وهندعم الشبكات لكن مشفناش أي حاجة".

وأضاف البهلول، "كلمت المحافظ بشكل شخصي وقلت له إن السنانية أكتر مكان بيعاني من سوء الخدمات والانقطاع شبه اليومي للكهرباء والمياه ووعدني بالحل، مر أكتر من 4 شهور ومحصلش جديد".

من جانبه، قال الدكتور إسماعيل عبد الحميد طه - محافظ دمياط، إن هناك حملات مكثفة بعدد من قرى ومدن المحافظة خلال أيام عيد الأضحى المبارك تمثلت في تطوير الشوارع الرئيسية والميادين إلى جانب رصف بعض المناطق بناء على مطالب المواطنين.

وأضاف محافظ دمياط، في تصريح صحفي، أنه جرى تجديد 200 كشاف لإنارة الأعمدة بالشوارع المختلفة بمدينة الروضة إلى جانب الانتهاء من أعمال الرصف بالبلاطات الخرسانية بمنطقة الشهيد الجمل وافتتاح وحدة إسعاف الروضة لخدمة الطريق الرئيسي حتى طريق "5 حديث".