الانقلاب اللي ماحدش بيتكلم عنه..

بقلم – محمود سالم:

فيه يوم كده الناس هتربط بين الانقسام التاريخي في الأصوات جو الإخوان على ترشيح مرسي، وسيطرة شلة الشاطر والقطبيين على الإرشاد وسهولة القبض عليهم.

في يوم من الأيام الناس هتاخد بالها إن جماعة الإخوان نفسها حصل فيها انقلاب، وإن اللي اتعود يبقى مخبر للأمن زمان أسهل حاجة يرجع يبقى ده تاني أول مايحس بخطر.

في يوم الناس حتفهم ليه القيادات بس اتقبض عليها وإزاي اتسلمو كده, وإزاي بديع اتقبض عليه عادي كده وإزاي مفيش أي محاولة حقيقية لمحاربة الجماعة فكريا من الحكومة والإعلام والاكتفاء برموزها بس.

تخيلوا بقى لو كان فيه فعلا مفاوضات وصفقة مع الجماعة، بس مش مع مكتب الارشاد. تخيلوا لو الكادرات اللي تحت قررت إنها تنقلب على النظام الداخلي هي كمان.

لو اتخيلتو ده، حاجات كتيرة قوي حتتفهم، منها عدم القدرة على الحشد، فقدان الاتصال المركزي, وإن فض رابعة بالشكل ده حصل باتفاق فعلا. وإن لما الناس تقول ان الإخوان هم السبب في فض رابعة بالشكل ده، إن عندهم حق بس مش للأسباب اللي فاكرينها، وإن الخيانة جت من جوا الجماعة نفسها.

عاوزكم تتخيلوا كادرات الوسط اللي امنت واشتغلت بجد للفكرة، وشافوا الجماعة بتضيع بسبب القيادة، وان كادرات تانية بتتظبط عشان شغالة رياء لخيرت والشلة. عاوزكم تتخيلوا شعورهم لما يشوفوا الفساد بعنيهم بيحصل جوا، والمحسوبية هي اللي بتتكافيء, وهم متسابين يبرروا ويتهزئو من جيرانهم وعيالهم بسبب الارشاد وتصرفاتهم الغبية.

عاوزكم تتخيلوا سنتين ونص من ده: من الاحباط والاحراج والمعاداه والقرف واهتزاز الايمان ورغبة الخلاص و الانتقام والبيع اللي ده ممكن يولده والتمن اللي مستعدين يدفعوه عشان ينقذوا من الجماعة مايمكن انقاذه.

تخيل تبقى من الاخوان دول اللي اتولدوا اخوان، اصحابهم وعائلاتهم اخوان، مايعرفوش حاجة تانية. والناس تقولهم بكل بساطة لو مختلفين مع علي بيحصل سيبوا الاخوان. .زي ماآجي اقولك كده اتبرى من المصريين عشان اللي قيادتنا بتعمله. مش حتعمل كده. ديه حياتهم كلها, يسيبوا إزاي؟

وتخيل بقى لما تكون الشخص ده، الإخواني اللي مش قطبي, اللي أمن واشتغل وفي الاخر اللي شاف الجماعة اللي هي كل حياته بتضيع من مكتب ارشاد همه بس مصالحه الشخصية. وتخيل لما تبقى قاعد بعد انتين يوليو بتتفرج على مكتب الارشاد بيضحي بناس غلابة في رابعة كورقة ضغط ومفاواضتهم في الأخر على فلوسهم وناسهم وعائلتهم ومش الجماعة. مش تبيعهم؟ إنتم فاكرين ان اعتصام رابعة كانت حاجة هبلة وشريرة بالنسبة لينا بس؟

التاريخ الرسمي للإخوان حيتكلم انهم إزاي اتظلموا وان ديه المحنة التانية، بس الحقيقي إن اللي حصل كان انقلاب على القطبيين للخلاص منهم داخليا. كان تطهير داخلي ضروري بعد سنتين من تدمير جهد تمانين سنة. تخيلوا بقى الضياع النفسي اللي حصل عشان يوصلوا للقرار ده ويبقوا عارفين ان ناس في رابعة حتموت عادي ويسيبوهم عشان ده تمن الخلاص والبقاء.

والألعن من ده كله, إنك تفهم ان اللي ماتوا في رابعة مكانوش بس ضحايا صراع سياسي على سلطة مصر وعسكر واخوان وثورة وانقلاب, بس صراع داخلي جوا الجماعة نفسها.

أنا معنديش معلومات بده على فكرة, ديه وجهه نظر بس الوقت هو ال حيبين كل حاجة, و موضوع الانقلاب الداخلي ده هيبقى من الحاجات ال مش هيبقى في دليل عليها غير المنطق.

..والقيادات الجديدة اللي حتمسك طبعا.

المقال رؤية شخصية للكاتب ولايعبر بالضرورة عن رؤية الموقع.