ياسمين عز: "اللي متجوزة منوفي بتشع وتشعشع".. وهذه مميزات الزوج الدمياطي

كتب- إسلام لطفي:

تناولت الإعلامية ياسمين عز، مواصفات وأهمية الزوج المنوفي خلال حلقة اليوم من برنامجها المذاع عبر قناة "MBC مصر"، قائلة: "يا هناكي يا سعدك يا وعدك لو متجوزه راجل من المنوفية، راجل عاقل ورزين ومش أي واحدة تعجبه ولا تملا دماغه عشان كده خليكي عارفه أنك لو اتجوزتي راجل من المنوفية ده إنجاز في حد ذاته".

وأضافت: "لأن القراره ده جه بعد أيام طويلة من التفكير والتمحيص والدراسات والمباحثات لحد ما توصل في النهاية أنك الست اللي تستحقي أنه يكمل حياته معاها ومعروف للجميع أن المنوفية بلد الكرم كله، وهتلاقي جوزك الراجل المنوفي كريم معاكي ومعطاء وكل اللي في جيبه ليكي أنت وولادك مش بعيد أبدًا يطلع اللقمة من بؤه ويديهالك واعرفيها قاعدة كده "المنوفي لا يلوفي مع البخل" يعني مش بيولف مع صفة البخل إطلاقًا".

وتابعت: "صعب تطلبي من جوزك المنوفي حاجة ويقولك لأ، حتى لو وقتها كان مزنوق أو مكنش معاه هتلاقيه بيعمل المستحيل عشان ينفذلك الطلب اللي طلبتيه منه، الراجل المنوفي هو اللي بينور الست ويخليها تشع وتشعشع وقلبه كبير وعقله يوزن بلد، ويفهمك من غير ما تتكلمي".

وتطرقت إلى مزايا الزوج الدمياطي أيضًا حيث قالت: "أهل دمياط طيبين والراجل الدمياطي رزق، والست اللي متجوزه دمياطي محظوظة عشان ربنا كرمها براجل حتة سكرة مفيش في خفة دمه وهو قادر في ثانية أنه يخرجك من أي مود وحش".

واستطردت: "ملهوش في اللف والدوران ومبيكرهش في حياته أد الكدب، عشان كده مستحيل تلاقيه بيكذب أو بيحور عليكي ولو في يوم غلط في حقك بيعترف بغلطه ويعتذرلك ويطيب خاطرك ويطبطب عليكي".

واستكملت: "الزوج الدمياطي فيه ميزة مش موجودة في أي راجل تاني موجود، دايمًا يحسس مراته أنها مهمة جدًا وأنها ست خارقة أو سوبر وومان، وأنها قادرة تعمل اللي مفيش حد في الدنيا يعمله غيرها".​