ياسمين عز: بقول للست المصرية "دلعي جوزك الشقيان"

كتب- يوسف عفيفي:

وجهت الإعلامية ياسمين عز، رسالة إلى الست المصرية، قائلة "بقولك للست المصرية دلعي جوزك"، مؤكدة أن حديثها يهدف إلى الحفاظ على الأسرة المصرية.

وقالت ياسمين، في برنامجها "كلام الناس" المُذاع على شاشة "إم بي سي مصر": إنها ستضيف فقرة جديدة للطبخ في برنامجها "كلام الناس" خلال الموسم الجديد.

وتابعت: أنا أشيلك يا مصري في عيوني مش بس على رموشي، وعندي مفاجأة في الموسم الجديد لأننا مكملين مع بعض ولأجل عيون ونخوة الراجل المصري أنا هعمل تسريحة ومطبخ في برنامجي عشان نتعلم نعمل أحلى الأكلات لـ رجالتنا الشقيانة ونتزين ليهم بأقل الإمكانيات.

وواصلت ياسمين: أنا رسالتي وصلت وهي عمار البيوت والأسرة المصرية، واللي بقوله على الشاشة بعمله برا مفيش تمثيل، وأنا مش هتكلم غير عن الراجل والست لأنهم الحياة ولما تنزل كائنات فضائية هبقى أتكلم عليها، ولكن دا اللي عندنا، وأنا في حياتي عمري ما قولت لفظ تحريضي أو تسخيني لـ راجل على مراته بالعكس بقول للست دلعي جوزك.

وتابعت: أنا كلامي دعوة للستر والزواج مش بطلق الناس بالعكس، ومش عارفة الناس معترضين ليه على كلامي، ولو إنت متغاظ أو حقود طلع صدقة وقول يارب نجحني.