وكيل "محلية النواب" مهاجمًا أجهزة الجيزة: "هياخدوا كارت أحمر قريب"

كتب- أحمد علي:

انتقد النائب محمد الحسيني، وكيل لجنة الإدارة المحلية بمجلس النواب، أداء بعض الأجهزة التنفيذية في الوحدات المحلية، وشن هجوما شديدًا ضد مديريات الطرق ووصفها بـ"الفاشلة".

وقال "الحسيني"، خلال اجتماع لجنة الإدارة المحلية بمجلس النواب، برئاسته، اليوم الأربعاء؛ لمناقشة مشروع موازنة محافظة الجيزة وخطة التنمية الاقتصادية والاجتماعية للعام المالي 2018/2019: "عايزين نعرف مدينة الجيزة إيه المشروعات اللي عملتها، ومديرية الطرق الفاشلة في 27 محافظة اللي محدش يعرف عنها حاجة ميزانيتها إيه، ومديرية الطرق في الجيزة مشروعاتها إيه".

وتابع "الحسيني": "مشاكل الكهرباء والصرف والمياه والطرق وغيرها، كلها بتروح للنائب، ولازم الأجهزة التنفيذية تشتغل وتتفاعل مع مشاكل الناس، وترسل خطابات لمجلس النواب عن إجراءات حل هذه المشاكل، لازم نفلتر ونراقب صح، لأن بالشكل ده مفيش مراقبة، هنراقب ناس مش عارفة حاجة ولا أي أرقام".

وانتقد وكيل لجنة الإدارة المحلية، زيادة بند تعويضات العاملين في الجهود غير العادية بموازنة محافظة الجيزة بمبلغ مليون جنيه عن السنة الماضية، قائلا: "تعويضات العاملين في بند الجهود غير العادية زادت مليون جنيه، طيب أنت عندك جهود أصلا، إزاي تزود مليون جنيه من قوت الشعب، وإيه هي الجهود غير العادية، إيه بيطلع يشتغل في الشمس يعني، عايزين نمنع الأرقام الوهمية دي".

وتابع: "بقول للناس اعرفوا إن المسئول اللى جزمته متلمعة متخدش منه رجا، هنحاسبك على أداء وبرامج، بعض المسئولين مش بيعملوا حاجة.. وديتونا فى ستين داهية والمواطن مش لاقي حاجة، رئيس الجمهورية شغال نتعلم منه، ونخلي القوات المسلحة تشرف هي على المشروعات، إحنا بنتكلم في مصير شعب، فيه 8 مليون مواطن في الجيزة، وعايزين نساعد المحافظ والأجهزة التنفيذية يشتغلوا، فيه ناس بتشتغل بجد وفيه ناس هتاخد كارت أحمر قريب إن شاء الله".​