باسم يوسف يرد: لماذا يواصل هجومه على "جهاز الكفتة"؟
باسم يوسف عن جهاز الكفتة
تطبيق مصراوي
لرؤيــــه أصدق للأحــــداث
كتب - وليد العربي:
علق الإعلامي الساخر باسم يوسف، على مهاجميه بخصوص انتقاده لجهاز علاج مصابي فيروس "سي"، الذي كان يشرف علية اللواء إبراهيم عبد العاطي، المعروف إعلاميًا بـ"جهاز الكفتة".
ووجه رواد موقع التواصل الاجتماعي "فيسبوك"، انتقادًا لاذعًا لباسم يوسف بقولهم: "هو أنت مش لاقي غير الكفتة؟، ما خلاص بقى الموضوع خلص؟ أنت قافش في الموضوع ده ليه ما ضحكنا وخلاص، أنت مش لاقي حاجة تانية تقولها؟".
وجاء تعليق الإعلامي الساخر باسم يوسف: "دي بعض التعليقات أو التبريرات اللي بتطلع كل ما بتكلم عن جهاز الكفتة بس الحقيقة أن الموضوع مش مجرد فضيحة وعدت، مش حاجة ضحكنا عليها وخلصت، الموضوع ده أكبر من كده بكتير".
وأضاف: "أن فضيحة "الكفتة" هي انعكاس لحاجات حصلت و لسه بتحصل و حتفضل تحصل في البلد دي"، موضحًا: "جهاز الكفتة هو انعكاس للكذب و البروباجندا الرخيصة اللي شفناها في ا ل"٣٠٠ مليار دولار " اللي دخلت مصر في وقت المؤتمر الاقتصادي".
"جهاز الكفتة هو انعكاس للوعود الفارغة زي ال "١٠٠ مليار دولار " الدخل المتوقع لقناة السويس".
"لما قلنا ان جهاز الكفتة ده فضيحة، الاعلام و المؤيدين نهشوا فينا و قالولنا موتوا بفيروساتكم زي بالظبط ما قلنا ان قناة السويس "الجديدة" اهدار لمال الدولة و رمي دولارات البلد على الارض في مشروع مالوش الاولوية و ادينا شايفين نتيجة ده دلوقتي".
"جهاز الكفتة هو انعكاس للانكار و الكذب اللي بينكشف و بيخلي شكل السلطة وحش قوي. زي الاختفاء القسري اللي مخبرين النظام طلعوا و قالوا مافيش، و دول انضموا لداعش و روجوا لده عن طريق بوستات فيس بوك مضروبة و بعدين يطلع كل يوم حالة من الحالات دي موجوده عند الداخلية فعلا".
"جهاز الكفتة هو انعكاس للجهل و الهبل اللي بيطلع من بق ممثلين للنظام اللي المفروض وصلوا لاعلى المراتب القيادية من اول "رياح شمالية غربية حتحمي مصر" ،"لتوليد الكهربا من السبانخ".
"جهاز الكفتة هو انعكاس لفكر المؤامرة الاهبل من اول "الزيبق الاحمر و هجوم الجراد و نقار الخشب" ل "قبضنا يا جماعة على قائد الاسطول السادس الامريكي". فكر المؤامرة اللي بيتم من خلاله القاء اسباب الفشل و الخيبة على مؤامرات كونية خفية بدل ما تعترف بكذبك و فشلك".
"جهاز الكفتة و البلطجة الاعلامية اللي طلعت معاه هو انعكاس لمقالب الزبالة اللي طالعة علينا من كل قناة اعلامية . و سواء حبيت تنكر ده او لا فصفايح الزبالة دي بشتايمهم و خوضهم في الاعراض هما ممثلين النظام و متسابين بمزاج النظام".
"جهاز الكفتة و فضيحته و التشويه المتعمد و اخراس اي صوت معارض له هو انعكاس لخنق اي صوت معارض و الانكار المصاحب له من اول "ماحدش بقى يتفرج عليه" ل "البرنامج ده ما بيجبش اعلانات " و كأن مقالب الزبالة اللي موجودة دي الناس كلها بتفرج عليها".
"جهاز الكفتة هو امتداد لفكر الستينات اللي ودى مصر في داهية ؛ البروباجندا الخايبة اللي قايمة على فكرة ان الناس بتنسى و اننا ممكن نمرر اي حاجة عشان "نغلوش" على الوضع و نلهي الناس باي حاجة. و نسيوا ان العالم ماعدش عايش في الستينات و ان ده خلاص ماعدش ينفع".
"جهاز الكفتة هو امتداد للفشل و الخيبة و عدم تحمل المسئولية و الكذب زي العيال الصغيرة. زيه زي ما تطلع سلاح الطيران وتقتل سياح من المكسيك و بعدين تقول دول تجار مخدرات ، او تقتل طالب ايطالي من التعذيب و بعدين تطلع شائعات عليه انه مات عشان ميول جنسية او بسبب حادثة عربية و في الاخر فضيحتك تبقـى بجلاجل في كل حتة في الدنيا".
"جهاز الكفتة هو انعكاس للمكابرة و عدم الاعتذار و رفض المحاسبة. زي ما اللواءات طلعوا هبوا في الناس و قالولهم ده امن قومي و انا ما يهمنيش نوبل ، زي ما بيكابروا و مش بيعتذروا و بيرفضوا المحاسبة لما تتكشف المصايب التانية".
"جهاز الكفتة هو انعكاس لبلطجة النظام و هو بيقولك "اهو كده و لو عاجبك" . زي ما النظام حمى النصابين بتوع الكفتة و ما حاسبهومش زي ما بيحمي بلجطة النظام بلبس امناء الشرطة اللي مطلوقين زي الكلاب السعرانة على الناس و ما حدش بيتحاسب".
"جهاز الكفتة هو انعكاس للعته و السفه و العنطزة الفارغة. في الوقت اللي البلد مش لاقية تاكل رحت انت فتحت مستشفيات و معامل و مراكز لعلاج الناس بالكفتة . زي ما انت بتقول للناس مافيش و بتزود مرتبات و معاشات الناس بتوعك و تتحرق فلوس البلد".
"جهاز الكفتة هو انعكاس للتمثيليات الخايبة اللي كل شوية تطلعولنا فيها. و افكركم هنا بالفيديوهات اللي اتصورت على اساس ان فيه ناس تم شفاؤهم على يد عبد العاطي و اماني الخياط تقول البواب بتاعها خف الحمدلله ، زيه زي فيديوهات البروباجندا الفارغة اللي بتطلع كل شوية تمجد في انجازات ما حصلتش".
"جهاز الكفتة هو الانكار المستمر لخيبتك و انعكاس لفشلك المستمر و لجوءك البائس لجهاز اعلامي اكثر بؤسا عشان يغطي على الفشل ده. و الغريبة ان الجهاز الاعلامي ده بيرجع و يهاجم جهاز الكفتة عشان يكسب مصداقية مزيفة زي ما بيطلوعا دلوقتي عاملين زي الفيران اللي بتهرب من سفينة غرقانة و يهاجمله النظام بكلمتين على اساس اننا حنصدقهم تاني".
"جهاز الكفتة هو نتاج تفكير نفس الناس اللي مسئولة عن كل المصايب و حتتسبب في مصايب اكبر. الفرق بس ان فضيحة الكفتة كانت كبيرة قوي و انكشفت بسرعة قوي و انتم كنتم داخلين بصدركم علينا قوي فاتفضحتوا قوي و بالمرة مسخرتم اسم الجيش اللي بتتهمونا اننا ضده. افعالكم دي هي اللي ضد الجيش و البلد مش احنا".
"جهاز الكفتة خلى مصر اضحوكة و نكتة في العالم زي كل المصايب اللي انتم بتعملوها" .
"عشان كده احنا مش بنألش على حاجة حصلت من سنتين . احنا بنوري فشل مستمر و بجاحة مستمرة و اصرار على الفشل".
"الكفتة هي انتم بفشلكم ببجاحتكم ببؤسكم بخيبتكم بفكركم العقيم"...انتهى.
فيديو قد يعجبك:
