شباب الإخوان ينتقد القيادات: "عظمناهم كأنهم رسل.. ضيعونا.. الكل خسران"

كتب- إبراهيم عياد:

بيان محمود حسين، القيادي بجماعة الإخوان المسلمين، الذي قال فيه إن محمود عزت، هو القائم بأعمال المرشد العام، آثار جدلًا بين شباب جماعة الإخوان المسلمين وحزب الحرية والعدالة المنحل.

انتقد علي خفاجي، أمين شباب حزب الحرية والعدالة "المنحل" بمحافظة الجيزة، قيادات جماعة الإخوان المسلمين على خلفية بيان محمود حسين، بينما قال محمد منتصر المتحدث الإعلامي باسم جماعة الإخوان، إن محمد بديع مستمر في منصبه مرشدًا عامًا، بحسب ما آلت إليه الانتخابات الداخلية التي أجريت في فبراير 2014.

وقال خفاجي عبر حسابه على موقع التواصل الاجتماعي "فيسبوك": "بشكل واضح الجماعة بتمر بأصعب لحظات حياتها ولسه مازال اللي خايف يتكلم ويحكي بحجة شق الصف وميعرفش ان بسكوته دة بيشق الصف بنفسه.. عالم ضيعونا ودلوقتي بيجهزوا علينا شايفين الجماعة عزبة ابوهم.. ربنا ينتقم منك ياللي كنت السبب في الكارثة دي ويورينا فيك يوم انت وكل معاونيك ومساعديك والمطبلاتية اللي مشغلهم".

وأضاف خفاجي: "د.محمود حسين اللي كان أمين عام للجماعة اللي كان بينزل بيانات باسم الجماعة يقول فيها وقتها "ليس لنا ممثلين في كذا وكذا وليس لنا متحدث غير متحدث الجماعة وفلان لا يعبر إلا عن نفسه.. طلع دلوقتي محمد منتصر المتحدث الإعلامي للاخوان قال إن في أمين عام للجماعة تم تعينه في فبراير الماضي وان المتحدث باسم الجماعة هو المعبر عنها مش حد تاني وان اللي قال حاجة ده بيعبر عن نفسه"، متابعًا: "وبقت فريقين بيلعبوا والكل فيها خسران لن يرحمكم التاريخ".

وتابع: "كلنا كنا السبب في اللي حصل دلوقتي.. سكوتنا على الغلط.. تطبيلنا على كلام ملوش اي معني ولا لازمة بس خارج من بوق قيادي.. تكرارنا لنفس الخطوات الغلط الاي بتودي لنفس النتائج.. خوفنا من اننا نقول الحقيقة للناس بحجة وحدة الصف.. تعظيمنا لبعض القيادات وكأنها رسل من عند الرب.. هذه فرصة جيل جديد من غير هذه الوجوه لتصحيح كل هذه الأخطاء".

في حين علق عمرو فراج، المسئول عن شبكة رصد التابع لجماعة الإخوان المسلمين، على بيان محمود حسين قائلًا: "هو ازاي أمين عام مدرسة مثلاً أو مجمع سكني ينزل بيان على صفحته الشخصية وما ينزلش على موقع المؤسسة دي الرسمي اأو صفحات السوشيال المعتمدة بتاعتها؟ هو ممكن يكون فيه كذا حل للموضوع ده.. إما أنه غير معترف بيه أمين عام للحاجة دي أو أنه مش شغال إدارياً صح او انه بيفرض نفسه عافية و بالدراع على الجميع.. إنما الأكيد إنه مش معترف بيه من الكيان ده طالما لم ينشر له بيانه الشخصي الذي يمثله و فقط".

وكان فرج قد ألمح بوجود اتهامات بمخالفات مالية لمحمود حسين، وذلك بحسب ما نشره يوم 23 مايو 2015، عبر حسابه على فيسبوك، حيث قال: "مرة واحد قيادى في مؤسسة ما.. اسمه محمود.. كلم واحد هربان تانى اسمه محمود أنه يطلع مقال يهاجم فيه أفعال ناس تانيين بتحاول تقوم بثورة إصلاحية وثورة شعبية فى مكان ما.. ومحمود التانى ده كان له تصريح وقح أيام مجلس الوزراء فى دولة ما بخصوص البنت اللى اتضربت واتعرت فى الشارع.."، يقصد تصريح غزلان الشهير عن فتاة التحرير خلال أحداث مجلس الوزراء وحديثه عن أنها ليست من جماعة الإخوان المسلمين.

وأضاف فراج: "المهم.. محمود الأولانى بعت لمحمود تالت هربان ومختفى تمامًا عن الساحة بقاله سنتين علشان يقوله الحقنا ولازم تظهر وتبطل أى نتيجة انتخابات أو حاجة تمت في فترة اختفائك لأن الثورة دى هاتشيلنا فى طريقها لأننا ناس مش نضيفة وتقدر تقول علينا من المرجفين فى المدينة".

وتابع: "الممتع فى الموضوع أن محمود الأولانى بيواجه الآن جلسات محاسبة تتهمة باختلاس مالى وشوية حاجات ما يصحش عمرو يقولها فى الفيس علشان عيب، وهو حد محترم نسبيًا".