سالي عبدالسلام تروي تفاصيل إصابتها بمرض الثعلبة

كتب- محمد أبوالمجد:

روت الإعلامية سالي عبدالسلام، تفاصيل إصابتها بمرض الثعلبة وعلاجها، قائلة: "أمي هي أكثر من يشجعني وبعد إصابتي بالثعلبة فكرت إزاي أقدر أوعي الناس، وأنا دائمًا مأخوذ عني فكرة إني قوية جدًا ودائمة الهزار والضحك وهو ليس بالأمر الحقيقي، وفكرت في عمل فيديو لتوضيح مرض الثعلبة وإثاره وكيفية العلاج منه".

وقالت "سالي" في حوارها لبرنامج "كلمة أخيرة" على فضائية "أون إي" اليوم السبت: "شوفت طفل شعره كله واقع، وكان بيقول لمامته هي هتاخد حقنة زيي، قولتله اه وكانت أمه باين عليها إنها مكسورة وباصه في الأرض وموجوعة، وقلت إني هعمل الفيديو الخاص بمرضي عشان أوعي الناس كلها".

وتابعت: "أمي راحت معايا للدكتور أول مرة ولما سمعت وجعي من الحقنة، ومقدرتش تستحمل، وقالت لي بعد كده روحي للدكتور لوحدك"، موضحة: "اكتشفت المرض لأول مرة وكنت في الكوافير عشان فرح أخويا بعد يومين، وبقول للكوافير حطلي شعر مستعار، بص لراسي وقالي روحي للدكتور لأنه كان خايف يقولي أو يوجعني، فقولتله شوفت ايه قالي ابقى روحي للدكتور".

واردفت: "لما روحت البيت وريت امي شعري لقيتها بتبص ليا وساكته، وراحت مصورة شعري، ولقيت حوالي 4 أو 5 كرات فارغة في رأسي ومكنتش عارفه هل دا معدي أو حاجة تكسف، وحسيت بقهرة لأن ربنا ابتلاني في أكثر حاجة بحبها وأكتر حاجة متميزة بها، واللي شعره حلو هيبقى شعره حلو والعكس".