"أنتم مين هو البلد مفيهاش حد غيركم".. أحمد موسى مستنكرًا شروط الحركة المدنية للمشاركة في الحوار الوطني

كتب - معتز عباس:

قال الإعلامي أحمد موسى، إن الحوار الوطني مستمر لكل المصريين وكل الأحزاب والقوى السياسية والمعارضة، مضيفًا: "أهلا بالمعارضة الشريفة والنزيهة اللي مش عايز تفرض شروطها على البلد".

وانتقد "موسى"، في برنامج "على مسئوليتي"، المذاع على فضائية "صدى البلد"، اليوم الأربعاء، ما يسمى بالحركة المدنية، قائلًا: "عندي كلمتين مهمين بعض التصرفات تخليك تقول اية اللي بيحصل في البلد، الرئيس دعا لإجراء الحوار وطني وده شيء عظيم ولم يختلف على عيله حد، لكن أنا شخصيا والناس ملاحظة إن الحركة المدنية والاخوة هناك تلاقيهم كل شوية بيانات ومطالب وطلبات وشروط كان البلد مفيهاش غير الحركة المدنية وكأن الحوار معمول عشان اخواتنا بتوع الحركة المدنية اللي الناس ماتعرفش هما مين".

وأضاف، قائلًا: "أنا بشتغل في الصحافة من 1983 مين هما أعضاء الحركة المدنية يمثلوا كام واحد في البلد؟.. أراضيكم اية، وعايز حد يطلع في الحركة يقول احنا الحركة المدنية عندنا مليون واحد في الشارع، قولي حضرتك معاك كام واحد، وموجود في أي محافظة، وفين تمثيلك".

ووجه "موسى" مقدم برنامج "على مسئوليتي"، سؤالًا للحركة المدنية، قائلًا: "أنتم مين أطلع قولي انتم مين، أشمعنى كل شوية بتتشرط، هو انت فاكر نفسك المعارضة الوحيدة في مصر، حزب الوفد فين موجود ولا التجمع موجود ولا أحزاب تانية موجودة ولا لأ، ليه عايز تحتكر الحوار الوطني وعايز تبقى فوق الحوار الوطني، هي البلد مفيهاش حد غيرك".

وأكمل، "موسى" منفعلًا: "لية كل شوية تطلع حضرتك تقول انا الحركة المدنية، وريني نفسك وقوتك فين في الشارع، كل شوية طلبات وشروط أكتر من وجودكم، لية حضرتك عايز تفرض نفسك على كل حاجة، طيب أعضاء الوفد يقولوا اية أقدم حزب عريق، الوفد يشكر ملهمش طلبات زيك ولا ربعك"، متابعًا: "انت مين بتخوفنا بتهدد البلد وبتهددنا.. حضرتك مين؟، أنا عايز الحركة المدينة يقولوا احنا مين وقوتك ايه في الشارع، كام واحد عندكم، بتهدد البلد لية، بتتشرط لية، كل شوية مفيش حاجة عجبك عايز ايه طيب ما تجيب من الاخر".