"نارنا بردت".. والدة نيرة أشرف عن حكم المحكمة بإحالة قاتل ابنتها لفضيلة المفتي

كتب- محمد أبوالمجد:

علقت سناء سعيد والدة نيرة أشرف طالبة المنصورة على حكم المحكمة بإحالة قاتل ابنتها لفضيلة المفتي تمهيدًا لإعدامه، قائلة: "البقاء والدوام لله، كنت موجودة في الجلسة أنا ووالدها والحمدلله".

وقالت "سناء" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "أول حاجة حسيتها النهارده بعد الحكم إن نيرة زمانها فرحانة في تربتها وأن حقها جالها ألف حمد وشكر ليك يارب"، موضحة: "قلبنا برد شوية ونارنا بردت الحمدلله أن حقها رجع".

وأضافت: "عائلتي استقبلوا الخبر كانوا فرحانين بطريقة فظيعة كلنا فرحانين أوي أن بنتي حقها رجعلها عشان تبقى مرتاحة في تربتها، وحسبي الله ونعم الوكيل في قاتلها"، مؤكدة: "عايز أشكر الناس اللي عملت صدقات لبنتي على الهواء، لأن في ناس عملت عمره واللي فرق مصاحف واللي عمل وجبات وذبح وبشكرهم جدًا أنهم الصراحه اعتبروها بنتهم وعملوا لها حاجات جميلة فرحت قلبي وخففت النار اللي في قلبي شوية".