"هددها من 3 أيام بالقتل".. والدة نيرة أشرف: "القاتل تربص بها ولو نعرف مكنتش نزلتها"

كتب- محمد أبوالمجد:

قالت والدة الطالبة نيرة أشرف ضحية المنصورة: "مكنش في بينهم قصة حب ولا أي حاجة خالص، دا مجرد زميل لها في الجامعة قصدته في أبحاث أيام الكورونا لأنها كانت قاعدة في القاهرة مش بتنزل وعملها الأبحاث ومن يومها فكر بقى إنها ممكن تحبه ويعمل علاقة معاها ويمشي معاها بالعافية غصب عنها"

وأضافت والدة نيرة، في حوارها لبرنامج "يحدث في مصر" على فضائية "إم بي سي مصر" اليوم الثلاثاء: "كانت بتقولي ايه الواد الأهبل اللي هفكر أبص له دا، وقعد يطاردها سنتين، وقعد يحط حسابات مزيفة على الفيس بوك، ويحط صور ويدخل على أبوها واخواتها وقاريبنا وأصحابنا وشردنا وعملنا سمعة زي الزفت، إما تكلمه أو يعمل فيها كده".

وتابعت: "قعدتها في القاهرة عند اختها وبقت تنزل على الامتحانات ولكن تربص بها وهي نازلة تمتحن، منعرفش أنه متربص لها، مكنتش نزلتها والله"، موضحة: "مقالتليش إنه مهددها من 3 أيام ومعرفتنيش حاجة وعرفنا دا من النيابة لما موبايلها اتفتح هناك واتضح أنه مهددها من 3 أيام، وإحنا مكناش نعرف، مقالتليش ولا قالت لحد".

وأردفت: "قالت كل مرة بيهدد مش هيعمل حاجه، فعلًا المرة دي موتها وخدها مني، خد حته من قلبي يا ناس".