"حافظ على وظيفتك".. خبير اقتصادي يوجه نصائح للمواطن في الأزمة الاقتصادية

كتب- محمد جمعة:

وجه الخبير الاقتصادي محمد نجم، عددًا من النصائح للمواطنين للتعامل الجيد مع الأزمة الاقتصادية العالمية وارتفاع الأسعار.

وقال نجم، خلال حواره مع برنامج "الحياة اليوم"، مساء الأربعاء: "بقول لأي مواطن لازم تحافظ على وظيفتك الحالية أو مصدر دخلك بأي شكل، محدش يعمل تغيير في أي حاجة أساسية في حياته، ده مش وقت مغامرة أو مجازفة".

وأضاف: "الحاجة الثانية لو انت مش متخصص في الاستثمار ومعاك فائض في الدخل، متحاولش تعمل مشروع مش فاهم فيه، يعني لو موظف ومعاك فلوس على جنب، روح حطهم مباشرة في البنك بدون أي تردد لأن الفائدة 18% عائد مش موجود في العالم وآمن ومضمون تمامًا ومفهوش أي مجهود".

وعن شراء الذهب، قال الخبير الاقتصادي: "شراء الذهب غلط لأنه متسعر بطريقة مش مظبوطة.. السعر العالمي بينزل وسعره الحقيقي دلوقتي 900 جنيه لكن في مصر 1200 جنيه وده رقم مش منطقي، لو من شهرين بس كان ممكن نشتري ذهب".

أما النصيحة الثالثة، قال نجم: "لازم نتعود نمسك ورقة وقلم، ونشوف إيه المصروف وإيه الإيراد كل شهر، وإيه اللي ممكن استغنى عنه لأن أكيد في حاجات تقدر تستغنى عنها".

وأضاف: "لو انت قادر تصرف ودخلك يسمح بده وعندك احتياطي ومدخرات ومظبط أمورك ياريت تصرف، لأن دعوات ترشيد الاستهلاك وربط الحزام والتقشف خاطئة.. اللي قادر يصرف ده بينشط الاقتصاد، لأن النمو الاقتصادي 80% منه استهلاك".

وتابع: "كل جنيه بنصرفه معناه فرصة عمل، وفلاح بيرزع ويحصد، كمان إحنا داخلين على موسم الصيف وفي أنشطة اقتصادية قائمة في الوقت ده، فلا أمنع اللي قادر يصرف إنه ينشط الاقتصاد بالاستهلاك.. أما لو دخل المواطن لا يسمح بالصرف فطبعًا لأ".

وأشار نجم إلى أن أننا بحاجة لعامين للعودة إلى الوضع الطبيعي بدءًا من وقت توقف الحرب الروسية الأوكرانية وانتهاء آثارها على العالم، متابعًا: "الضرر اللي حصل في العالم عمري ما شفته في كتاب اقتصادي ولا تاريخ، فالأزمة معقدة ولم يسبق لها مثيل، وبنقول زي ما قال رئيس الوزراء أتحدى أي مؤسسة اقتصادية تتوقع الوضع هيكون عامل إزاي في اليوم التالي".

وأضاف الخبير الاقتصادي أن الأزمة في مصر لا تزال تحت السيطرة بسبب الاحتياطات الجيدة في السلع والنقد الأجنبي والموازنة العامة، ودخول تمويلات واستثمارات أجنبية ووجود السياحة.