"منقدرش نتأخر".."القلعة" عن تبرعها بـ 30 مليون جنيه لتوفير لقاح كورونا لغير القادرين

كتب- محمد خميس:

علق الدكتور أحمد هيكل، رئيس مجلس إدارة شركة القلعة، على التبرع لصندوق تحيا مصر بـ 30 مليون جنيه لتوفير لقاحات كورونا لغير القادرين، قائلًا: "كلنا في مرحلة تتطلب أن كل واحد يقدر يعمل حاجة لازم يعملها، وأحنا منقدرش نتأخر عن حاجة بالأهمية دي"، مضيفًا: "الدولة بتقوم بدورها، وأحنا كقطاع خاص ومش بس شركتنا في شركات كتير بتساهم في هذا الأمر، وكلنا لازم نحط ايدينا في أيد بعض مع الحكومة اللي عاملة شغل ومجهود جامد في هذا الأمر وكلنا لازم نعمل الإسهام بتاعنا".

وأوضح "هيكل" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "تواصلنا مع صندوق تحيا مصر وطالبنا بالمساهمة في توفير لقاحات كورونا لغير القادرين، وعندنا ثقة كاملة أنهم بيقوموا بالخطوات الجيدة في هذا الاتجاه، ومتكلمناش في التفاصيل ودا مبلغ التبرع بتاعنا وشخصيًا مطمن لأقصى الدرجات، أن مبلغ التبرع هيروح في المكان المطلوب".

وتابع: "الأشخاص القائمين على صندوق تحيا مصر في غاية الكفاءة والنزاهة ومحدش هيزايد أو هيبص وراهم، لأنهم ناس على أقصى درجة من الكفاءة وبالأمس كان في اجتماع وسعدت بشكل بالغ بكافة الأشخاص اللي كانوا موجودين وحاجة تدعو للفخر والبلد لازم تبقى سعيدة أن هؤلاء هم القائمين على هذا الأمر".