"كان مؤمن بالقدر"..نجل السادات: "مسك الختام أن والدي مات وسط ولاده"

كتب- محمد خميس:

قال جمال السادات، نجل الرئيس الراحل أنور السادات: "يوم اغتيال والدي 6 أكتوبر عام 1981، مكنتش في المنصة، وحسيت أني قصرت أني مش موجود، وكنت مسافر في إجازة"، متابعًا: "يوم اغتيال والدي هو العرض الوحيد اللي محضرتوش وكنت دائمًا بحضر العروض".

وأضاف "السادات" في حواره لبرنامج "كلمة أخيرة" مع الإعلامية لميس الحديدي، على فضائية "ON E" اليوم الثلاثاء: "احساسي بالتقصير في عدم وجودي في العرض يوم اغتيال والدي، يواجهه شعور بالفخر بدون أي حدود، عشان حقيقي 6 أكتوبر بالنسبة لي والدي حقق كل اللي المصريين كان نفسهم فيه وهو النصر بإيمانه بربنا وثقته في القوات المسلحة وإيمانه بأن قضيته هي قضية حق وبيحارب عشان حق وربنا كرمه".

وتابع: "والدي حقق هدفه في الحياة وهو كان راجل مؤمن بالقدر، والواحد مش هيعيش للأبد، ودا مسك الختام أنه مات وسط ولاده"، مؤكدًا: "والدي كان عنده ربنا ثم القوات المسلحة، ومكنش يتمنى أحسن من كده، ودائمًا كان بيقولنا أنه نفسه يكون في الجبهة في حرب أكتوبر 1973".