"صحافة العالم بالغت في الصفقة".. سميح ساويرس معلقًا عن امتياز شركة "توماس كوك"

كتب- محمد خميس:

علق المهندس سميح ساويرس، رجل الأعمال، على حصوله على امتياز شركة "توماس كوك " في ألمانيا، قائلًا: "الصحافة في العالم كله بالغت في هذه الصفقة؛ لأن هذه الصفقة صغيرة جدًّا مقارنةً بحجم الشركة التي أمتلكها، وأنا عمال أضحك بقالي 3 أيام على حجم التضخيم في هذه الصفقة وكأني فتحت عكا".

وأضاف ساويرس، خلال مداخلة هاتفية مع برنامج "الحكاية " المذاع عبر فضائية "إم بي سي مصر"، اليوم السبت: "حقيقة الأمر أننا منذ 5 سنوات اشترينا جزءًا من (توماس كوك) قد اللي اشتريته المرة دي 5 مرات، وماحدش كتب عليه حاجة!"، موضحًا: "المرة دي كان فيه 100 شركة مملوكة لعدد من الأفراد، ووسط إفلاس الشركات قالوا لي أنت اشتريت شركات مثيلة ليه ما تاخدش الشركات دي بدل ما يقفلوا؟ وقلت ليه لأ".

وتابع رجل الأعمال: "كانت النتيجة أن الدنيا افتكرت أني اشتريت شركة (توماس كوك) كلها، أنا مشتري توزيع شركة (توماس كوك) اللي بتوزع رحلاتها عن طريق شركات خاصة بها وعن طريقنا نحن أيضًا؛ لأننا كنا بنبيع رحلات ليها بأرقام كبيرة جدًّا".

وأوضح ساويرس: "مصفّي الشركات طالبني بشرائها، ولما بصيت على شركة (توماس كوك) ككل، لقيت أنها مديونة لأصحاب الفنادق في العالم كله بما فيه مصر بأرقام مهولة، تخيل أنهم مديونون بنحو 800 مليون، فلو أنا كنت اشتريتها كلها كانوا هيحصلوا مني الفواتير اللي على الشركة".

وتابع رجل الأعمال: "مش عارف الأرقام اللي مديونين بها لمصر قد إيه، واحنا في الجونة لينا عندهم نحو 400 ألف يورو، ودول مش هييجوا لأنهم مفلسون بالكامل"، موضحًا: "إحنا نمتلك شركة (RTK)، وهي أكبر شركة توزيع في العالم؛ فهي أكبر شركة تبيع لشركات السياحة، وهذه الصفقة تعتبر شركات أفراد وهتفيد مصر بأن نحو 100 شركة تم إنقاذها من الإفلاس هتبعت لنا سياح من هناك".

واستطرد ساويرس: "شركتي تملك نحو 1200 شركة زي اللي تم شراؤها في الصفقة، واحنا أكبر شركة بتجيب سياح لمصر، اللي أنا دخلت فيها شريكًا، وما دخلتش في الشراكة إلا عشان أضمن إن مصر ما تتنسيش"، معقبًا: "(النيويورك تايمز) قالت إن أهم بلد في الشرق الأوسط وإفريقيا السنة دي هو مصر، ولازم نراعي السياح وناخد بالنا منهم عشان ده اللي هيخلِّي الناس ترجع مرة واتنين لبلدنا".