بالفيديو| خالد الجندي يهاجم مصطفى العدوي: بيخلي الناس ملاحدة ومشركين بدون علم

كتب-محمد قادوس:

أذاع الشيخ خالد الجندي، عضو المجلس الأعلى للشئون الإسلامية، مقطعين فيديو للداعية السلفي مصطفى العدوي، يتحدث فيه عن أن قول كلمة طبيعي، مثل سمن طبيعي أو لبن طبيعي، أو زيت طبيعي أو خلافه، نسب الأشياء للطبيعة هذا من مسلك ومن أقوال أهل الشرك والإلحاد، شرك ان تقول هذا المفروض ان كل ما يحدث في الكون هو بإرادة الله.

وتابع الجندي، خلال حلقة برنامج لعلهم يفقهون المذاع على فضائية dmc، اليوم الثلاثاء: "طبعا الراجل ده كثير من كلامه خطأ وكارثي، والناس بتفكر خطأ بيني وبينه عداوة، تعالوا شوفوا كلامه يعنى لما يتهمك انك ملحد أو مشرك، اسمع بقى أغرب فتوى ممكن تسمعها في حياتك، شوفوا الجهالة اللى تفوق حدود الإدراك يعنى لما تقول سمن طبيعي أو لبن طبيعى بتنسبه للطبيعة وده كلام المشركين والملاحدة، يقوم مولانا يحول كل الستات لملحدين عشان لو قالت بطبخ بسمن طبيعى أو لبن طبيعى، هذا الرجل بيقول حاجات عجيبة".

واستكمل: "ده راجل متعلم معاه بكاليورس هندسة قسم ميكانيكا، هو مش عارف ان العلم تخصص وبالتالي الفتاوى بتخرج كوميدية، يعنى واحدة ترضع رضاعة طبيعية تبقى شرك، يبقى لو على كلام الشيخ يبقى تقول رضعت ابنى رضاعة ربانية".