حقيقة منع ويجز من الغناء في مصر..حلمي عبدالباقي يرد

كتب- هاني صابر:

كشف الفنان حلمي عبدالباقي، تطورات أزمة ويجز مع نقابة المهن الموسيقية وحقيقة منعه من الغناء في مصر.

وقال عبدالباقي، ببرنامج "سبوت لايت": "جبنا كل مغنيين المهرجانات وعملنا اجتماع معاهم والمشكلة اتحلت، ومصطفى كامل جلس معاهم وأبلغهم انه ضد منع مطرب من الغناء".

وتابع حلمي: "مصطفى كامل قالهم بصوا انتوا واجهة مصر لما نسافر بره، ومش هينفع نقول أي لفظ خارج، ولازم كل واحد فينا يمضي على كدة ويبصم، وأي أغنية هتنزل لازم نبعتها على المصنفات الفنية الأول قبل نزولها، وكلهم وافقوا على الشروط دي".

وتابع: "ما حدث كان احتواء صح، وكان أيام الأستاذ هاني شاكر (ناس مع وناس ضد) وكان فيه لغط كتير في الشارع، ومغني المهرجانات ليهم شريحة كبيرة جدا في الشارع وليهم مزيكا حلوة ولكن التعليق المأخوذ عليهم يكمن في الكلمة واحنا ضد الكلمة المُسفة والاسفاف لأنها بتدخل بيتي والأطفال بيرددوها وكان لازم نحافظ على الذوق العام ومغني المهرجانات ينتمون لشعبة الأداء الصوتي".

وعن أزمة ويجز مع النقابة، فأضاف: "ويجز المفروض يجي النقابة زي ما كل الناس جت النقابة، ويمضي على كل الاقرارات زي بقيت مغني المهرجانات، ولغاية دلوقتي مجاش وملوش تصريح بالغناء لحد دلوقتي، ويعمل حفلات برا مصر، ولكن جوه مصر لازم يجي يمضي على الاقرارات بأنه ممنوع أي كلام فيه ابتذال بأغانيه وحفلاته، وعليه أن يأت للنقابة والامضاء على الاقرارات اذا أراد إقامة الحفلات في مصر".