أرملة أحمد راتب: "مكنش عندي تليفزيون وعشنا ظروف مادية صعبة"

تحدثت أرملة الفنان الراحل أحمد راتب، عن ظروف حياتها مع زوجها في الأيام الأولى ومدى الظروف الصعية التي كانوا يمرون بها.

وقالت أرملة أحمد راتب: "الفترة الأولى بحياتنا، قعدنا حوالي سنة الظروف المادية كانت صعبة، وأنا محسستوش بده خالص وكنت بطلع لجارتي أتفرج على التلفزيون عندها عشان مكنش عندي تليفزيون".

وتابعت: "كنت بعمل كل حاجة بنفسي مع إني طالعة بنت مدلعة على أربع صبيان.. وكنت بعمل كل حاجة في بيتي وقعدت سنة فعلا كانت صعبة جدا ماديا

وأنا محسستوش خالص، لدرجة اني بروح لـ ماما مثلا الله يرحمها وأقولها ماما والنبي أنا ممعيش فلوس .. ماما والنبى اديني جنيه علشان التاكسي لأن معايا عشرة جنيه سليمة يعنى مقولش إن أنا ممعيش فلوس، لا مينفعش".

واستكملت: "مكنتش بركب تاكسي وأخد أتوبيس عشان تاني يوم ناكل من الجنيه، ومقولش لماما إنه مجوعني ولا مفيش فلوس أو كدا لا خالص .. دي مواقف خلته يحس فعلا اني سند ليه وستر ليه لغاية ما ربنا الحمد لله كرمنا".

وعن رفضها إخبار والدتها بظروفها المادية الصعبة، فأضافت: "أولا عشان مضايقهاش .. ثانيا مش هحرجه .. ثالثا لازم ألم بيتي .. مش من المنطق إن أنا أخبي على أمي لأ، أنا مش عايزة أضايقها إن ظروفي كذا وأقول على أسرار تعتبر أسرار بيتنا، مينفعش".

يذكر أن أحمد راتب رحل عن عالمنا في 14 ديسمبر عام 2016 عن عمر ناهز الـ67 عاماً تاركاً إرثاً فنياً ضخماً بأدوار متنوعة وشخصيات عالقة في الذاكرة قدمها في 130 فيلماً سينمائيًا كوميدي وتراجيدي، هذا بخلاف المسرحيات والمسلسلات الدرامية والأعمال الإذاعية.