سمية الألفي: "السرطان مرض صعب وبطلت أرد على التليفون"

كتبت- بهيرة فودة:

تحدثت الفنانة سمية الألفي عن تفاصيل معاناتها مع مرض السرطان العام الماضي 2022، وأنها قد تعافت منه مؤخرًا، وردت على الأخبار التي انتشرت اليوم، عبر مواقع التواصل الإجتماعي عن تدهور حالتها الصحية

وقالت الألفي في مداخلة هاتفية لبرنامج "مساء دي أم سي"، الذي تقدمه الإعلامية إيمان الحصري، على شاشة "DMC"، :"أنا كويسة الحمد لله كله تمام، عدت سنة على الجراحة السرطان، والتحاليل أثبتت إني تعافيت، كل حاجة كويسة أوي".

وأضافت الألفي عن الأخبار التي انتشرت اليوم، عبر مواقع التواصل الإجتماعي عن تدهور حالتها الصحية: "أنا مندهشة وتليفونات طول النهار، أنا بطلت أرد على التليفون، ودي إشاعات مش عارفة جابوها منين، ملهاش أي أساس من الصحة، الحمد لله".

وتابعت: "هيبقى فيه متابعة، لأن السرطان مش سهل نمشي ونسيبه كدا وخلاص، هيكون في متابعة بعد سنة، وبعدها كل شهر، وبعد ما تعدي سنة كمان هيكون المتابعة كل 3 أو 6 شهور".

وأكملت: "ربنا كريم، الحمد لله، ومش عايزة الناس تنزعج بالأخبار الغير حقيقية".

وأضافت: "أنا ما أتكلمتش مع أي حد في أي تفاصيل نهائي عن مرضي، وما أعرفش جابوا منين الكلام دا، بيألفوا ويلحنوا مع نفسهم".

واختتمت الألفي حديثها عن فترة مرضها العام الماضي: "كانت سنة صعبة أوي أوي، يعني بتمنى من ربنا محدش يواجهها أبدا لا اللي أعرفه واللي ما أعرفوش، بتمنى لكل الناس السلامة، السرطان مرض صعب أوي، والتعافي منه أصعب، والعلاج بتاعه أصعب وأصعب، وأنا مرت عليا سنة الحقيقة من أثقل السنوات على عمري، بس الحمد لله ربنا كبير ووقوف أحمد وعمر جنبي وأصدقائي وزملائي وزميلاتي، الناس كلها الحقيقية، وكل قرايبي وعائلتي دعموني دعم كبير أوي"

واختتمت الفنانة سمية الألفي حديثها عن مشاركتها في أعمال خلال الفترة المقبلة: "أعمال لا ما أفتكرش"