مصطفى درويش: اعتذرت عن "الملحد" في أصعب ظروف.. بس ديني أهم

كتب- عبد الفتاح العجمي:

قال الفنان مصطفى درويش، إن قراره بالاعتذار عن استكمال مشاهده في فيلم "الملحد"؛ اتخذه رغم أنه يحتاج إلى الماديات وللعمل لأنه في بداية الطريق، حسب وصفه.

وكتب درويش، عبر حسابه بموقع "فيسبوك": "الأزهر قال كلمته ونصر الحق.. ممكن مسمعش صوت معارض لو سمحتم لأن إحنا مرجعيتنا للأزهر، وأنا ولا شيخ ولا حاجة، أنا لسه باديء أنتظم في الصلاة من قريب، وكان بعد مشكلة حصلتلي فقربت من ربنا، واعتذاري عن الفيلم جالي في أصعب ظروف، محدش عارف عنها حاجة، محتاج ماديات فعلا، ومحتاج شغل لإني لسه في أول الطريق".

أضاف: "أكيد اعتذاري عن الفيلم كان على عيني، بس ديني أهم، وأنا لا غلط في الأستاذ إبراهيم ولا غلط في حد، أنا بس أخدت قرار أدافع عن الصلاة اللي بصليها، والإسلام اللي هو ديني ودين أمتي، ولو كان الأستاذ غلط في أي ديانة مسيحية أو غيرها كان هيبقى نفس موقفي، أنا مسلم مؤمن بكل الرسل والديانات السماوية ومقبلش حد يشكك في الكتب السماوية وأسكت، نقفل الموضوع ده علشان أخد أكبر من حجمه".

وكان الفنان مصطفى درويش، أعلن الاعتذار عن استكمال مشاهده في فيلم "الملحد"، بسبب أن مؤلف العمل هو الإعلامي والكاتب إبراهيم عيسى، وكتب عبر حسابه بموقع "فيسبوك": "قررت أنا مصطفى درويش مقاطعة أي برنامج لإبراهيم عيسى.. والاعتذار عن فيلم (الملحد) اللي صورت فيه أربعة أيام بسبب أن مؤلف القصة هو إبراهيم عيسى".

أضاف كاشفا السبب: "واضح أن الحرب دي ممنهجة، وأنا مقبلش أبدا أكون أداة للحرب ضد ديني ولو الثمن هيكون إيه، آسف جدا وبعتذر لكل فريق العمل، مش هكمل في القرف ده".

وكان الإعلامي إبراهيم عيسى قال خلال تقديمه لبرنامجه "حديث القاهرة"، على قناة "القاهرة والناس"، إن واقعة الإسراء والمعراج لا يوجد فيها معراج، قائلاً: "طب إيه رأيك إن مفيش معراج، هتصدق إن مفيش؟ وكل قصة إنه طلع السما وشاف الناس اللي في السما وشاف الناس في النار كل دي قصة وهمية كاملة، دي كتب السيرة والتاريخ والحديث هي اللي بتقول، لكن هو مصدّرلك الكتب والقصص اللي بتقول حصلت".

فيلم "الملحد" من إنتاج السبكي فيلم للإنتاج الفني والتوزيع (أحمد السبكي)، تأليف إبراهيم عيسى، إخراج محمد العدل، وبطولة النجوم: أحمد حاتم، حسين فهمي، محمود حميدة، شيرين رضا، صابرين، نجلاء بدر، تارا عماد، وأحمد السلكاوي وغيرهم.