عفاف شعيب: "الخيانة.. كانت سبب طلاقي من المنتج رياض العريان"

كتب- هاني صابر:

أكدت الفنانة عفاف شعيب، أن طلاقها من المنتج رياض العريان كان بسبب الخيانة.

وقالت عفاف، ببرنامج"واحد من الناس" على شاشة "الحياة": "أنا لم أتزوج من رياض بسبب الفلوس، وأنا مكنتش هتجوزه خالص، وكان الأستاذ حسين كمال سبب الجوازة دي، والأستاذة مجيدة نجم وهي عايشة واسألوها، وكنت وقتها بأقدم فيلم (أفواه وأرانب)، وكان حسين يقولي الراجل متيم بيكي والراجل ده بيحبك، وده اللي هيصونك في الوسط".

وتابعت: "أمي وأخويا مكنوش موافقين على جوازي منه، لأنه كان متزوج وعنده عيال، وفي الآخر وافقت".

واستكملت: "أنا كنت ست ملتزمة جدا، وحاولت مهدش بيتي وحياتي الزوجية، ولكن كانت الأمور صعبة أوي، والراجل اللي بيخون بتبقى عينه زايغة".

وأضافت: "بعد طلاقي من المنتج رياض العريان، اتجوزت وكان طالب مني أعيش معاه في لندن لأن كان شغله هناك، وقالي هنقعد شوية وهنرجع مصر نعيش هناك، ولما الوقت طول في وجودي هناك، رفضت أعيش معاه في لندن وقولتله (استحالة أسيب مصر)، فقالي (لأ) ، وقولتله (وأنا لأ) .. وهو يتمنى حتى الآن إني أرجعله تاني".

يُذكر أن آخر أعمال الفنانة عفاف شعيب حكاية "واحد في المية" من مسلسل "زي القمر"، مع صابرين ومدحت صالح، من تأليف فداء الشندويلي وإخراج أحمد شفيق.