منة فضالي تنصح شرين عبد الوهاب:" ياريت مننساش نفسنا"

كتبت- منال الجيوشي:

نصحت الفنانة منة فضالي، المطربة شيرين عبد الوهاب، بمراجعة نفسها والتوقف عن "الغلط"، منددة بما قالته في مقطع فيديو انتشر على مواقع التواصل الاجتماعي، وفسره البعض بأنه سخرية من المطرب الكبير عمرو دياب.

وقالت "فضالي" على صفحتها الرسمية على الفيس بوك :"طبعا أنا من عشاق صوت شيرين، ولكن مش علشان نجامل أو نطبل لحد، نغلط في الناس، والناس اللطيفة اللي بتضحك أوي وللأسف هما زملاء مهنة، بتضحكوا على إيه حتى لو مش في وعيك، وفي مود تاني، عيب أوي".

وتابعت: "عمرو دياب انتي اتربيتي على أغانيه، وكل الجيل اللي في سنك واللي بعدك، راجعي نفسك انتي بتغلطي كتير أوي، ومتنسيش أن الجمهور له دور قوي في نجاحك، عُمر الغلط ما حيفيدك بالعكس هتخسري كتير أوي".

وهاجمت شيرين قائلا: "وبعدين مننساش نفسنا، كنتي إيه وقتها وعمرو دياب كان إيه، وبكرة السن اللي بتتكلمي عليه هتوصلي له، بس متعرفيش شكلك هيكون إيه، أو صحتك عاملة إزاي، والأعمار بيد الله".

واختتمت "منة" كلامها قائلة: "خسارة شيرين، نزلتي من نظري ونظر كل الناس، للعلم عمرو دياب من أصدقائي اللي أنا بحبهم وبحترمهم، واللي أعرفه مهما كبر عمر ما حد من الجيل الجديد، هيحقق أو هيوصل للمكانة ولا النجاح زيه".

يذكر أن نشطاء التواصل الاجتماعي تداولوا على نطاق واسع فيديو لشيرين أثناء تواجدها فى حفل زفاف الفنان عمرو يوسف، والفنانة كندة علوش، تحدثت فيه ببعض الكلمات، التي اعتبرها البعض مسيئة لبعض الفنانين.