محمد سامي يكشف حكايته مع مؤلف مسلسله "العمدة" بطولة محمد رمضان

كتب- وائل توفيق:

كشف المخرج السينمائي محمد سامي حكاية مؤلف أعماله الفنية القادمة، من بينها مسلسل "العمدة" بطولة الفنان محمد رمضان، وذلك عبر صفحته الخاصة بموقع تبادل الصور "انستجرام".

وكتب محمد سامي: "من فتره طويلة جاتلي مكالمة وسط مكالمات كتير لشباب بيعرضوا مشاريع من تأليفهم سيناريوهات أفلام ومسلسلات واللي كلمني الشاب اللي واقف ورايا في الصورة، اللي لفت نظري ليه في المكالمة أسلوبه وترتيب أفكاره وثقته في نفسه وموهبته اللي كانت واضحة في شغفه تجاه الفن، حاجة كمان لفتت نظري ليه وهي عزة نفسه رغم مكالماته الكتير ليا وفرض وإقحام نفسه فحياتي حتي أيام الأجازات ونصاص الليالي".

وتابع: "وبعتلي أفكار وقلتله اكتب يا صديقي وإديني حاجه أقرأها، إنت مقضيها حكي وبس وده مش صح، وغاب فترة وقلت عليه كسول عايز يرغي وبس وبعدها بسنة ظهر وبعتلي سيناريوهات كتير كان غايب بيكتبها وقريتها كلها ولقيت عنده حاجة حلوة وبدأنا نبقي أصحاب علي التليفون وزي مالقيت عنده حاجة حلوة لقيت حاجات كتير وحشة في الكتابة وبدأت أناقشها أنا وهو وغاب تاني و رجعلي بمشاريع تانية مكتوبه أحسن".

واستكمل: "وفضلنا نعمل كده وقت طويل قوي لحد ما طلبت منه نتقابل وفعلا إتقابلنا وهو دلوقتي صديقي وزميلي والخبر المهم اللي في الموضوع إنه هو اللي بيكتب معايا مسلسلي الجديد مسلسل العمدة بطولة النجم محمد رمضان إنتاج محمد السعدي وقصة وإخراج محمد سامي وسيناريو وحوار محمد سامي ومهاب طارق".

وأضاف: "كمان هو مؤلف فيلمي الجديد ومؤلف مسلسل على منصه مهمة إخراجي بعد العمدة إن شاء الله، اسم الشاب ده مهاب طارق، خريج معهد السينما اللي طلع عباقرة كتير من أساتذتنا وزمايلنا".

واختتم: "شكرا كل أساتذة المعهد علي مهاب وشكرا أمه وأبوه اللي ربوه الرباية المحترمة دي والبوست ده عشان يدي طاقة إيجابية لكل موهوب وموهوبة ويخليهم دايما عندهم الأمل إن كلنا محتاجينهم أكتر ما هما محتاجين لينا، مصر بلد الفن والمبدعين، مبروك يا مهاب وعقبال كل زمايلك ودفعتك اللي متأكد إنهم هما كمان فيهم مبدعين زيك".

يذكر أن الفنان محمد رمضان أعلن عن تعاونه مع المخرج محمد سامي في مسلسله الرمضاني المُقبل، الذي يحمل اسم "العمدة".

ونشر رمضان صورة تجمعه بالمخرج محمد سامي، عبر صفحته الرسمية بموقع "فيسبوك"، وعلق: "عملنا مع بعض مسلسل الأسطورة والبرنس.. ورمضان القادم بإذن الله ميعادنا معاكم بمسلسل العمدة، تأليف وإخراج محمد سامي، ثقة في الله نجاح".

يذكر أن آخر أعمال محمد رمضان التليفزيونية مسلسل "المشوار"، الذي عُرض على قناة Dmc، رمضان 2022، وعبر منصتي شاهد وواتش ات، وهو من إنتاج شركة "ميديا هب - سعدي جوهر"، بمشاركة الشركة المتحدة للخدمات الإعلامية.

View this post on Instagram

A post shared by Mohamed Sami (@directormohamedsami)