"اسكتي ياشيرين".. بهاء الدين محمد يعلق على أزمة شيرين عبد الوهاب بسبب حسن أبو السعود

كتب-مصطفى حمزة:

كشف الشاعر بهاء الدين محمد، عن موقفه من التصريحات التي أدلت بها الفنانة شيرين عبد الوهاب، خلال المداخلة الهاتفية مع برنامج "كلمة أخيرة"، والتي ذكرت خلالها الموسيقار الراحل حسن أبو السعود ، قائلة": "أنا كنت زي البدر، ولما اتجوزت حسام حبيب بقيت زي حسن أبوالسعود".

الشاعر الكبير، الذي كتب العديد من الأغاني الناجحة التي لحنها الموسيقار الراحل، علق عبر صفحته في موقع فيسبوك، وكتب،:" حسن أبو السعود، حبيبي اللى عمرى ما حسيت إنه مش في الدنيا، واللى كل الوسط بيحبه وكان وجوده فى أى مكان بيعمل حالة من البهجة، بروحه الطيبة وقلبه اللى كله حب وفن ".

وأضاف،:"الفنان اللى عملنا مع بعض نجاحات عايشه لحد النهاردة، ومنها أسف حبيبتي، لما النسيم، في ناس، أصعب حب، وعدى الليل، عمال يحكيلي عنها، ومئات الأغانى اللى كان بخبرته في اللايف بيعرف يجيب الجملة اللى الناس تحبها، وبالفعل سيطرنا سنين على الساحة الغنائية وغيرنا كتير، ده غير أنه كان من أفضل العازفين على الأكورديون في العالم".د

وتابع،:" وفي يوم من الأيام وهو نايم تعبان لقيته إبتسم لي، وسألنى أنت عارف مين أكتر حد ح يزعل عليا لما أموت ؟ قلت له إسم من أسماء ولاده . قالى لأ أنت أكتر حد ح يزعل عليا، وبالفعل أنا مابقيتش حتى أمشى من شارع بيته، وفضلت فترة طويلة أنسى أنه مات لأنه عشرة فن وحياة، وكان بيحبنى كأنى إبنه وكان بيفرح لي بكل نجاح، حتى لو مش معاه وح أبقى احكيلكم إزاى إتقابلنا لأن الموضوع ده مهم".

وعن تصريحات الفنانة شيرين عبد الوهاب، كتب ،:"المهم علشان أقول اللى ضميرى بيحسه في موضوع شيرين عبدالوهاب، واللي جهات كتير عايزني اقول، رأي في كلامها عنه أو وصفها ، أنا بكل صراحة بقول محستش إنها قاصده تهينه ولا تسخر منه، هي بس استدعت سيرته بشكل يبدو ساخر، لكن أنا رغم إنى متضايق منها، وهو عندي من أغلى الناس، إلا إن إحساسي قالي انها ماتقصدش" .

بهاء الدين، أضاف،:" لأن فعلا لما كنا بنتقابل كان بيحتفل بشيرين وبيحب فنها، والبساطة اللى فيها وهى كانت بتحبه وتحترمه، وللعلم أنا لما كنت اروح له وشبعان ومش طايق أشوف أكل أول ما يقولى تاكل بأداء مشوفتش زيه بلاقى نفسي أجوع، الله يرحمه كان فنان ودمه خفيف و قلبه قلب طفل".

وأكمل،:" بس هى غلطانه إنها بتطلع تتكلم، ولو ليا سلطة عليها مش ح أخليها تنطق لا على مسرح ولا لقاء ولا حتى في حياتها الشخصية، أسكتى يا شيرين".

الفنانة شيرين عبد الوهاب، أصدرت مساء أمس بيان عبر مكتب محاميها ياسر قنطوش، قدمت خلاله اعتذارها إلى أسرة الموسيقار الراحل حسن أبو السعود.

وجاء نص البيان، كالتالي: "تعلن الفنانة شيرين عبد الوهاب أنها تكن كل الاحترام والتقدير للموسيقار الراحل حسن أبو السعود، وأنه خطأ غير مقصود تماما، وأنها تكن كل الاحترام والتقدير لأسرته الكريمة".