سميرة سعيد: "بيقولوا إني بقوي الستات على الرجالة بأغنية محصلش حاجة"

كتبت- منى الموجي:

تصوير- محمود عبدالناصر:

أكدت الفنانة سميرة سعيد أنها لا تقصد تقديم أغاني تغضب الرجل، مثل "محصلش حاجة" و"سوبر مان".

وأضافت قبل تقديم أغنية "محصلش حاجة" في حفلها اليوم بمهرجان الموسيقى العربية في دورته الثلاثين "أنا مصرة الست تبقى حرة وقوية، ومحصلش حاجة من ضمن الأغاني اللي بيقولوا اني بقوي بيها الستات على الرجالة".

وتذكرت الفنانة سميرة سعيد، الموسيقار الكبير بليغ حمدي، في حفلها اليوم بدار الأوبرا المصرية، المُقام على مسرح النافورة.

وقالت سميرة "هغني حاجة كلاسيكية من الحاجات العتاقي، اللي كنت بعملها زمان كلمات سيد مرسي وألحان بليغ حمدي من الحاجات اللي بحبها ومخدتش حقها وكنت زعلانة لانها حلوة جدا، هغنيها عشان بحبها وعشان روح بليغ حمدي تكون ما بينا، أغنية (كتر الكلام)".

وقالت سميرة إن حياتها الفنية شهدت الكثير من التطورات، ما بين الكلاسيك والحديث، وتنقلت بين الحداثة والأصالة.

وتابعت "احترت اغني ايه الحاجات الجديدة ولا القديم والنوستالجي، ايه رأيكم.. فيه أغنية في النص من ألحان الموسيقار العظيم صلاح الشرنوبي (لعلمك انت)".

ووجهت الفنانة سميرة سعيد الشكر لوزيرة الثقافة الدكتورة إيناس عبدالدايم، ولإدارة مهرجان الموسيقى العربية في دورته الثلاثين.

وفي بداية كلمتها، قالت سميرة "المخرجة جيهان مرسي، عشرة عمري صاحبتي وحبيبتي أصرت اكون موجودة في المهرجان ده، خصوصا انه يحمل اسم الدكتور جمال سلامة، اللي مهما اتكلمت عليه مش هوفيه حقه".

وأضافت "دكتور جمال جزء من تاريخي، مفيش حاجة حلوة عملتها قد شغلي معاه، (حلو حبك) كانت البداية كل الأغاني اللي بغنيها لغاية النهاردة وجوايا من ألحان جمال سلامة، سعيدة اننا بنكرمه وبنديله حقه الادبي والفني، وده السبب الحقيقي اللي خلاني اكون النهاردة وياكم، غير اني مبسوطة بوجودكم وحضوركم، لأني بحب اي حد بيجي دار الاوبرا بحس انه هو بيحب الفن الحقيقي شكرا".

سبق فقرة سميرة سعيد في حفل اليوم على مسرح النافورة، فاصل أحياه الفنان اللبناني زياد برجي.