عمرو سلامة يكشف عن الهدف من تقديمه ورشة عن السينما

كتبت– منال الجيوشي:

كشف المخرج عمرو سلامة، عبر صفحتيه الرسمية على "فيسبوك" و"تويتر"، عن أهدافه من المشاركة في ورشة عن السينما، تحت عنوان "الأفلامجية.. دهشور".

وعلق "عمرو" قائلا: "الأهداف الحقيقية والأنانية ليه أنا بعمل ورشة عن السينما من غير ما آخد عليها فلوس، أولا وبصراحة لإن مهما كانت الفلوس مش هتساوي المجهود اللي بعمله علشان أحضرلها وأعملها، لإني بتسئل كل يوم كذا مرة وبيتبعتلي رسائل كثير يوميا مضمونها إزاي أتعلم سينما، أو إزاي أخش في المجال، وعلشان أنا لا عندي وقت ولا طاقة أجاوب واحد واحد فبصور الورش علشان تبقى متاحة للناس، فبدل ما أجاوب أبعت لينك".

وتابع المخرج الشاب قائلا: "السبب الأهم إني بكبر، والمخرجين والكتاب مهما كانوا جامدين لما بيكبروا في السن بينفصلوا عن العالم وبيفقدوا قدرتهم على التطور وعلى تكوين مخزون إبداعي جديد، فمهم إننا نتواصل مع مواهب جديدة عندها أفكار جديدة وقصص جديدة ووجهات نظر مضادة لينا ونحاول على قد ما نقدر مش ندرسلهم على قد ما نتشارك معاهم ونطرح خبراتنا والأهم نسمعهم ونسمع أفكارهم وآرائهم".

وأضاف: "ورشة الأفلامجية (دهشور) اللي هي ثالث ورشة للأفلامجية، بتأكدلي ثاني إن مصر فيها الخير، والإنترنت فعلا ساعدت ناس كثير يتعلموا ويطوروا موهبتهم مهما كان مكانهم في أي محافظة أو حي، وكذا فيلم من اللي شوفتهم للمتقدمين حتى حسسني إن موهبة المتقدم يمكن أحسن من موهبتي لما كنت في سنه وبكثير كمان".

واختتم "عمرو" حديثه قائلا: "الورشات دي بتفيدني زي ما بتفيدهم والضيوف اللي جم زي خالد دياب، ومروان حامد، وهاني أسامة وماريان خوري، أنا استفدت منهم شخصيا بمعلومات جديدة عليا، وبشكر المشاركين، والمقدمين اللي ماعرفناش نختارهم والضيوف، لإني فعلا في الثلاث أيام دول اتعلمت منكم كتير، وقريبا محتوى الورشة هيكون متاح على يوتيوب ببلاش للجميع، وأتمنى يكون مفيد لأي حد عايز يتعلم سينما أو يعرف إزاي يخش المجال، وساعتها محدش هيبقى عنده حجة".