أبوالليف: أشجع أغاني المهرجانات بشرط عدم الإسفاف أو الابتذال

كتب- حسن مرسي:

قال الفنان نادر أبو الليف، إنه يحب ويشجع أغاني المهرجانات، ولكن اعتراضه على الإسفاف والابتذال المتمثل في كلمات الأغاني، مضيفًا: "بحب الأغاني دي بس مش حابب ابني وبنتي تسمع بعض كلمات الأغاني اللي بتكون مبتذلة".

وأضاف أبو الليف، في مداخلة هاتفية مع الإعلامي وائل الإبراشي، ببرنامج "التاسعة"، المُذاع عبر القناة الأولى المصرية، مساء الخميس: "عمر كمال صوته كويس وقلت له ابعد عن جو المهرجانات لأنه مش لايق عليك".

وتابع: "أنا بشتغل ولكن مش بالكم ولكن بشتغل علشان أعيش مبسوط مش علشان أجمع فلوس.. سأضطر لبيع عربيتي علشان أؤكل عيالي.. طيب أؤكل عيالي منين.؟.. سأبيع عربيتي أو أجيب سواق وأشغلها أوبر لو الدنيا وقفت تماما".

واستطرد: "أنا بقيت مطلوب في الحفلات أكثر من الأفراح لأن أغنية الفرح بقت مستهلكة".

وعن الخلاف الذي نشب بينه وبين ابن شقيقته الشاعر أيمن بهجت قمر مؤخرًا، قال: "أقول له لا تنساق وراء أي كلام.. أنت مش عارف غلاوتك عندي؟.. أنا بحبه في الله ومش عايز أي حاجة منه"، مضيفًا: "الفن مش دايم ولو دامت لغيرك كان دامت لك.. أقول له حقك عليا لو غلطت فيه وده ما حصلش".