بكاء هيستيري لـ"الليثي" ومنى الشاذلي تضطر للخروج إلى فاصل.. إليك السبب

استضافت الإعلامية منى الشاذلي مقدمة برنامج "معكم"، المذاع عبر فضائية "سي بي سي"، اليوم الخميس، مجموعة من أعضاء فريق "SNL بالعربي"، حيث يكشف نجوم البرنامج الشهير: إسلام إبراهيم، نانسي صلاح، محمود الليثي، توني ماهر، يارا فهمي، أحمد سلطان، جوانب مجهولة في حياتهم، ويروون حكايات لأول مرة تُذاع على الهواء، وقصص الكفاح التي مروا بها قبل أيام الشهرة.

وقال الليثي إنه تخرج في كلية هندسة، وكان يعمل مهندسًا في محافظة بورسعيد، لكن رغبته في التحاقه بمجال التمثيل جعلته يترك العمل ويتوجه إلى ورشة المخرج المسرحي خالد جلال، للالتحاق بها، متابعًا: "أنا كنت ميسور الحال، ولما قدمت في الورشة كنت أسافر يوميًّا من بورسعيد إلى القاهرة، لغاية ما قربت من العرض المسرحي الأول ليَّا".

وأضاف الفنان: "أخدت إجازة من شغلي، بعد 3 شهور كل اللي حوشته من شغلانة الهندسة راح، وما عنديش شغل تاني، لأني مرتبط بمواعيد ورشة يومية، وماكنتش عارف أشتغل في أي شغلانة، كل الفلوس راحت، والأكل قل، وصلت إني ماعيش فلوس أجيب أكل، كنت كل يومين أكل كيس إندومي".

وأكمل الليثي باكيًا: "كنت ساكن في أوضة على السطوح في الجيزة، مع ثلاثة من صحابي، وكنت بمشي كتير من الجيزة للأوبرا عشان الحق العروض، أنا كنت بأرفض أطلب من أهلي فلوس عشان أخوض المغامرة دي، وكنت بقول لهم إني مش عايز فلوس.. اتنقلت المستشفى كتير، وكان في اتنين من أصدقائي وقفوا جمبي، وفي مرة ما كانش معايا حق تذكرة المترو، كنت وصلت لمرحلة إني مش قادر أمشي على رجلي، كان فيه حد ضيف موجود معانا في البيت، وما كانش فيه غير أنا وهو، وطلبت منه فلوس، 10 جنيه، قال لي مش معايا، وصعبت عليَّا نفسي، ومن بعد ما كنت مهندس بقيت مش عارف اللي باعمله ده هيوصّلني لغاية إيه، وهارجع تاني أشتغل مهندس والتضحية دي في مكانها ولَّا لأ".